“Mançester Yunayted”də Kriştiano Ronaldonun səbəbkar olduğu qanqaraldıcı vəziyyət davam edir. Erik ten Haq problemin ən yaxşı həlli variantını tapıb.

"Football-plus.az" xəbər verir ki, 37 yaşlı ulduz futbolçu İngiltərə premyer-liqasının 12-ci turunun “Tottenhem”lə oyununda (2:0) meydana çıxmaqdan imtina etmişdi. Ronaldo matçın sona çatmasını gözləmədən stadiondan ayrılmışdı. Buna görə portuqaliyalı futbolçu əsas komandadan uzaqlaşdırılıb. Həmçinin ona böyük məbləğdə - 720 min funt sterlinq cərimə kəsilib. MY-nin baş məşqçisi Ten Haq Kriştianonun yolverilməz davranış və hərəkətinə görə komandadan üzr istəməsini vacib sayır. Niderlandlı mütəxəsis futbolçunun təkcə ondan və komanda yoldaşlarından yox, klubdan üzr istəməsini istəyir. Səbəbkar yalnız bundan sonra klubun bazasında məşq edə biləcək.

Son xəbərlərə görə, Ronaldo bu həftə MY ilə hazırlıqlara qayıtmaq istəyir. Amma o, çalışdırıcının bir istəyini də qəbul etməlidi. “Athletic” qəzetinin xəbərində futbolçunun ehtiyat oyunçu statusu ilə barışmalı olduğu da vurğulanır. Kriştiano məşqçinin bu tələbini qəbul edəcəyi halda ümumi qrupda məşqlərə buraxıla bilər. Əks halda yanvarda özünə yeni iş yeri axtarmalı olacaq.