'Sənə təşəkkür edirəm. Argentinada, eləcə də bütün dünyada mənə dəstək verən, karyerama və oyunuma heyranlıq duyan çox insan var. Sənin sayəndə onların hamısına təşəkkürümü bildirirəm. Eyni zamanda mənimlə böyüyən və məni əsl çempion kimi görən bir nəsil var. DÇ-də də onların böyük dəstəyini arxamda hiss edəcəm. Özümü fiziki cəhətdən çox yaxşı hiss edirəm. Ötən il PSJ-yə gəldiyim dönəmlə müqayisədə indi daha yaxşı durumdayam. Yaş amili nəzərə alaraq bu turnirin karyeramdakı sonuncu mundial olacağını demişdim. Amma yığma karyeramı bitirib-bitirməyəcəyimə DÇ-dən sonra qərar verəcəm. Bizdən çox şey gözləyirlər. Ona görə də həyəcanlıyıq. Argentina favoritlərdən biri hesab olunur. Əvvəlki turnirlərdə belə deyildi. DÇ çox çətin turnirdi. Qalib gəlmək üçün çox şeyi qurban verməlisən. Bu Argentinanın təməli 2019-dakı Amerika Kubokunda qoyuldu. Həmin vaxt hiss etdik ki, bizim üçün yeni dönəm başlayır. Çünki yarımfinalda Braziliyaya qarşı çox yaxşı oynasaq da, məğlubiyyəti həzm etməli olduq. Ondan sonra gözlədiyimiz kimi yüksəlişə keçdik. Həyat yoldaşım Antonella mənim üçün çox dəyərlidi və həyatımda böyük rol oynayır. Bəzən məğlubiyyət mənə həddən artıq pis təsir edir. Onu unutmaqda çətinlik çəkirəm. Belə anlarda evə qayıtdıqdan sonra Antonellanı və uşaqlarımı görərək sakitləşirəm. Həyat yoldaşım məni o vəziyyətdən çıxarmağa, məğlubiyyəti unutdurmağa çalışır. Bunun üçün düzgün məqamı seçməyi bacarır. Etiraf edim ki, karyeramın əvvəlində məğlubiyyətlərdən sonra özümə qapanırdım. Heç kimi görmək istəmirdim. 2-3 gün heç kimlə danışa bilmirdim. Amma birinci övladım doğulandan sonra uğursuzluğa başqa cür reaksiya verməyə və hər şeyə fərqli gözlə baxmağa başladım. Yığmada bizim ''vatsap'' qrupumuz var. Aquero karyerasını bitirsə də, qrupda ən fəallardan biridi. Hələ də oyunları böyük həyəcanla izləyir. Bəzən orda çox yazmaqla məni əsəbləşdirir (gülür). Çünki bekardı və boş vaxtı çoxdu. Amma onun yaşadığı çətinlikdən sonra üzünün güldüyünü görmək xoşdu. Aquero əla strimerdi. Bu işi sevir və ondan zövq alır. Düşdüyü çətin vəziyyətdən çıxmağı bacarıb''.