21 yaşını fevralın 12-də tamamlayan Xviça Kvaratsxeliya A seriyasındakı debüt oyunlarında necə möhtəşəm təsir bağışlayıbsa, indi bütün İtaliya ondan danışır.

Adətən, İtaliyanın şimalından olan klubların həyatını geniş işıqlandıran, cənublulara yuxarıdan aşağı baxan Turin qəzeti “Tuttosport” da Xviçanın soyadını manşetinə Kvaradona kimi çıxarıb. Təbii ki, gürcünün soyadını əfsanəvi Dieqo Maradonaya uyğunlaşdırıblar. Adı çəkilən qəzet gürcü vingerin “Montsa”ya qarşı oyununu 9 balla qiymətləndirib. Qəzet yeni ulduzun doğulduğunu vurğulamağı da lazım bilib.

Cənub klublarına geniş yer ayıran, Romada nəşr olunan “Corriere dello Sport” manşetinə bu sərlövhəni çıxarıb: Kvarastella, yəni Kvaraulduz. Bu üzə çıxan manşetdi, içəridə isə qoşa səhifədə Xviçanın üç fotosu yer alıb: “Neapol Xviça deyir”. Aydın məsələdi ki, burda o oyunun ən yaxşısı seçilib. Hərçənd “Tuttosport”la müqayisədə qiyməti aşağıdı – 8. Xviça “La Gazzetta dello Sport”dan da bu qiyməti alıb. Bu nəşr elə ilk turdan sonra Xviçanı Kvaradona adlandırmış və qeyd etmişdi ki, mərhum Dieqo Maradona da qarışıq indiyə qədər heç bir futbolçu “Napoli”dəki debüt oyununda qol və məhsuldar ötürmə ilə yadda qalmayıb.

Xviçanın o qədər də böyük olmayan fotosu burda da üz qabığına çıxıb, hələ gürcüyə böyük bir yazı da həsr olunub. Sərlövhəsi isə belədi: “İlin transferi”. Sərlövhəlatında deyilir ki, sehrbaz Kvaradona cəmi 10 milyona başa gəlib. İş ondadı ki, İtaliyada Xviçanın “Napoli”yə məhz bu qiymətə başa gəldiyini hesab edirlər. Yəqin avro ilə. A seriyasında ilk iki turdan sonra bombardirlər cədvəlinə 3 qolla məhz Kvaratsxeliya başçılıq edir. “Napoli”nin baş məşqçisi Luçano Spalletti isə iddia etməkdən yorulmur ki, Xvitsa bundan da yaxşı oynayamağa qadirdi. Guya gürcü vinger meydana hələ bir qədər sıxılmış vəziyyətdə çıxıb. Əvəzində “Napoli”nin sabiq futbolçusu, vaxtilə Maradona ilə birgə skudetto qazanan, argentinalıyla dostluq edən Salvatore Banyi Xvitsanın ünvanına kompliment deməkdən çəkinmir. Onun “La Gazzetta dello Sport”un əməkdaşı Mauritsio Niçitaya dedikləri: “Kvaranı ilk dəfə hələ Gürcüstanın U-17 yığmasında oynayanda görmüşəm. Artıq onda böyük istedadı gözə dəyirdi, ancaq həmin vaxtdan bəri bütün istiqamətlərdə güclü şəkildə “artırıb”. Xviçanın A seriyasına belə parlaq debütü məni təəccübləndirmədi. Onun unikal texniki bacarığına əvvəllər də şübhə etmirdim. Ancaq sevindirici məqam odu ki, gürcü özünü çox cəsur və inadkar göstərir: daim driblinqə can atır, rəqibi təkbətək mübarizədə keçməyə çalışır. Bəli, Kvara hələ ki özünü təvazökar “Verona” və “Montsa” ilə oyunlarda parlaq göstərib, ancaq top-klublarla oyunlarda da bunu bacarsa, əsl ulduz ola bilər. Mənim anlayışıma görə Xviça bu çempionatda asanlıqla 10-dan artıq qol vurar. Gürcü futbolçu “Montsa” ilə oyunda sol və sağ ayağı ilə qol vurdu, ilk turda hətta başla fərqləndi ki, bu da onun əsas özəlliyi deyil. “Napoli” supersövdələşmə həyata keçirib. Klub Kvaranı satmaq istəsə, əməlli-başlı qazanacaq”.
...Çox ümid edirik ki, Varşavadan – “Legiya”dan bir sillənin hökmü ilə qaçan, indi isə Zaqreb “Dinamo”sunda start heyətinə uzaqdan baxan Mahir Emreli özündən 4 yaş kiçik gürcünın uğur hekayəsini oxumağa vaxt tapacaq. Sadəcə, oxusun və yadda saxlasın. Onsuz da nəticə çıxaran və ya “Dinamo”dan daha güclü kluba yollanan deyil. Yaxşı tanıdığımız Badri Kvaratsxeliyanın 21 yaşlı oğlu bu gün dünyanın ən güclü çempionatlarından birində tarix yazır. Biz isə uzaqbaşı barmağımızı soruruq. Maraq üçün aşağıda sabiq SSRİ-dən olan legionerlərin A seriyasındakı statistikasını da veririk. Bu statistika isə təkcə Mahirə yox, özündən deyən bütün azərbaycanlı futbolçulara ünvanlanıb. Baxın, gözünüzə su verin!

ölkə oyunçu sayı oyun qol
Rusiya 11 541 96*
Ukrayna 11 484 163
Gürcüstan 2 322 24
Moldova 3 212 14
Belarus 4 194 13
Litva 3 170 16
Ermənistan 1 87 27
Estoniya 2 71 0
Özbəkistan 2 61 11
Qazaxıstan 1 32 1
* - cari mövsüm nəzərə alınmayıb.