Startı avqustun 13-nə təyin olunan A seriyasının 2022/23 mövsümü ərəfəsində diqqəti cəlb edən məqamlardan biri kapitanlarla bağlıdı.

Liqada çıxış edəcək 20 komandanın tən yarısının - onunun kapitanı dəyişib. Belə klublar arasında “Yuventus”, “Milan” və “Napoli” də var. Səbəblər fərqlidi. Gəlin, yeni sarğı ilə bağlı dəyişikliklərlə yaxından tanış olaq.

1. Filippo Bandinelli (Empoli). Nə qədər qəribə səslənsə də, faktdı: ötən mövsüm “Empoli”nin daimi kapitanı olmayıb. Sarğını daha çox – 19 oyunda daşıyan müdafiəçi Simone Romanyoli bu yay azad agent kimi “Parma”ya yollanıb. Yeni kapitan Filippo Bandinelli seçilib. İtaliyalı futbolçu meydanın mərkəzində çıxış edir. Son mövsümdə A seriyasında iştirak etdiyi 35 oyunda 2 qolun və 3 məhsuldar ötürmənin müəllifi olub. Onun komandada hamıdan çox – 10 dəfə sarı vərəqə aldığını da qeyd edək. Filippo “Empoli”nin formasını ardıcıl 4-cü mövsüm daşıyacaq.

2. Leonardo Bonuççi (Yuventus). İtaliyanın ən titullu klubunun kapitanı zərurətdən dəyişib. Sarğının əvvəlki daşıyıcıları olan müdafiəçi Corco Kyellini ilə hücumçu Paulo Dibala azad agent statusu ilə uyğun olaraq “Los Anceles”ə və “Roma”ya üz tutublar. Etiraf edək ki, Bonuççi böyük məsuliyyəti üzərinə götürməyə layiqdi. Uğurlarla zəngin olan karyerasının 11 ilini “Yuventus”da keçirən 35 yaşlı müdafiəçi, necə deyərlər, dayanmaq bilmir. Ötən mövsüm zədələrdən çox əziyyət çəkən AÇ-2020-in qalibi çempionatın 24 oyununda meydana çıxıb və 5 qol vurub. Komanda onun oynaya bilmədiyi noyabr, yanvar və mart aylarında çox xal itirmişdi.

3. Alessandro Tuyya (Leççe). “Leççe” A seriyasına qayıtmaqda elə də ciddi problem yaşamadı. Komanda B seriyasında qələbələri sıralayarkən kapitan Fabio Luççioni idi. İtalyan futbolçu artıq “Frozinone”yə qayıdıb. İndi onun yerini bir il əvvəl “Benevento”dan gələn və qısa müddətdə əsas heyətdə möhkəmlənən müdafiəçi Alessandro Tuyya tutub.

4. Davide Kalabriya (Milan). Alessio Romanyoli sərbəst oyunçu kimi “Latsio”nun sıralarına qoşulub. “Milan”da 7 il top qovan müdafiəçi üçün son mövsüm heç də parlaq keçmədi. Alessio zədələrə görə il ərzində bütün turnirlərdə 24 oyuna (A seriyasında 19, Çempionlar Liqasında 5) çıxa bildi. Məşqçilər korpusu növbəti mövsümdə Davide Kalabriyaya böyük ümidlər bəsləyir. Çempionluq mövsümündə 26 oyuna 2 qol vuran müdafiəçi A seriyasında ən gənc kapitanlardan biri olacaq. 25 yaşlı futbolçu karyerasını indiyədək doğma klubuna həsr edib və qırmızı-qara formada 165 oyun keçirib.

5. Matteo Pessina (Montsa). Matteo “Montsa”ya lap yaxında keçib. “Atalanta” onu A seriyasının debütantına birilliyə icarəyə verib. Məlumunuz olsun ki, Pessina Bonuççi kimi AÇ-2020-in qalibidi. Pandemiyaya görə ötən yay təşkil edilən qitə çempionatında Uels (1:0) və Avstriyaya (2:1) vurulan qələbə qollarının müəllifi olub. Ötən mövsüm bütün turnirlərdə 31 oyun keçirən hücumçu uşaq yaşlarından azarkeşlik etdiyi “Montsa”da xüsusi statusa malik olacaq.

6. Covanni Di Lorentso (Napoli). Neapolluların kumiri Lorentso İnsinye azad agent kimi “Toronto”ya yollandı. Müdafiəçi Kalidu Kulibali isə 38 milyon avroya “Çelsi”yə satıldı. Rəhbərlik yeni kapitan kimi Covanni Di Lorentsoya üstünlük verib. Müdafiənin sağ cinahında oynayan futbolçu son mövsüm meydana çıxdığı müxtəlif yarışlarda 41 oyuna 1 qol vurmağa və 6 məhsuldar ötürmə etməyə nail olub.

7. Frank Riberi (Salernitana). Əvvəlki kapitan Milan Curiç son mövsümdə hamıdan çox – 33 oyun keçirmişdi. Bosniya və Hersoqovinadan olan hücumçu indi “Verona”nın sıralarındadı. Onun statusu isə Frank Riberiyə həvalə olunub. Məşhur fransalı yarımmüdafiəçi artıq 39 yaşındadı. Buna baxmayaraq, aşkar autsayder gözü ilə baxılan “Salernitana”nın A seriyasında qalmasında heç də az rol oynamayıb. Sabiq “Bavariya”lının komandada hamıdan çox - hər oyuna orta hesabla 1,3 açar ötürmənin müəllifi olduğunu xatırladaq.

8. Canmarko Ferrari (Sassuolo). Canmarko “Sassuolo”da ardıcıl 7-ci mövsümə başlayacaq. Müdafiənin mərkəzində və solunda oynamağı bacaran futbolçu ötən mövsüm iki göstəricidə bütün oyundaşlarını arxada qoyub: o, dəqiq uzun ötürmələrə (hər oyuna orta hesabla 4,6) və topalmaya (hər oyuna orta hesabla 3,1) əsasən “yaşıl-qaralar”ın birincisi olub.

9. Saşa Lukiç (Torino). Andrea Belotti klubla müqaviləsini yeniləmədiyi üçün hazırda azad agent kimi özünə iş yeri axtarır. Onun yerini tutan Saşa Lukiç son mövsümü kifayət qədər yaxşı keçirib. Serb yarımmüdafiəçi A seriyasında 35 oyuna 5 qol vurub və oyundaşlarına 4 məhsuldar ötürmə verib. Məhsuldar fəaliyyəti ilə seçilən Saşa dəqiq ötürmələr etməklə yanaşı cərimə meydançasının kənarından tez-tez zərbə endirməsi ilə də fərqlənir.

10.Roberto Pereyra (Udineze). “Udineze”nin yeni kapitanı argentinalı universaldı. Yarımmüdafiənin mərkəzində və önündə oynamağı bacarır. Hətta hərdən hücumçu mövqeyində çıxış etmək bacarığı da var. Roberto digər güclü keyfiyyətlərə də malikdi: dəqiq ötürmələri və yüksək səviyyədə pressinqi udinelilərə heç də az fayda verməyib. A seriyasının son mövsümündə keçirdiyi 24 matçda “qol+ötürmə” sistemi üzrə 8 xal (“3+5”) toplayıb.

ORXAN