Biz bu filmi görmüşdük. Ötən il dekabrın 9-da “Qarabağ” səfərdə “Bazel”lə qarşılaşırdı.

Bu oyuna qədər həm “Qarabağ”, həm də “Bazel” qrupdan çıxmağı təmin etmişdi. Yeganə sual qrup qalibinin kim olacağı idi ki, həmin görüşün nəticəsinə görə birinci yerin sahibi də müəyyənləşəcəkdi. Görüşün 2-ci dəqiqəsində Abdulla Zubirin zərbəsindən sonra top qapı xəttini keçdi, amma görüşün Xorvatiyadan olan hakimləri “Qarabağ”ın “təmiz” qolunu hesaba almadı. Özü də top qapı xəttini azı bir metr keçmişdi. Yəni “Qarabağ”ın qoluna hansısa formada şübhə etmək mümkün deyildi. UEFA-nın “Qarabağ”ın oyunlarına göndərdiyi hakimlərin səhvlərinə o qədər adət etmişik ki, “qarapaltarlılar” bizi belə kobud səhvlərə təəccübləndirə bilmirlər.

“Yamanlığa yaxşılıq nər kişinin işidi” deyiblər. Qurban Qurbanov da UEFA-nın bütün bu yamanlıqlarına “Marsel”lə oyunda etdiyi yaxşılıqla cavab verdi. Özü futbolçusunu çağırıb tapşırıq verdi ki, get, hakimin səhvini düzəlt, topa əllə toxunduğunu ona de. Bu mərd davranışıyla Qurban bəy bütün dünyanın gözündə nər kişiyə çevrildi. Ölkə başçısı İlham Əliyev də Qurbanovun bu davranışına biganə qalmayıb, yüksək qiymət vermişdi. Düşünmək olardı ki, UEFA öz əməllərindən utanacaq. Həmin hadisədən sonra “Qarabağ”ın oyununa hakim göndərəndə onlardan daha diqqətli olmağı tələb edəcək, “köhlən atlar”ın iştirakı ilə baş tutan oyunlara ədalətli hakimlər göndərəcək. Deyəsən, bacarmırlar. Yeni mövsümün 3-cü qarşılaşmasında “köhnə film”lərdən daha bir epizod gördük. Bosniya və Hersoqovinadan olan baş hakim İrfan Pelto və onun köməkçiləri “Sürix”in oyundankənar vəziyyətdən qol vurmasına göz yumdu.

2:0 hesabı “Qarabağ” üçün əla idi. Hiss olunurdu ki, hesab İsveçrə çempionunu həm əsəbləşdirir, həm də tələsdirir. Belədə irəli atılan “Sürix”i cəzalandırmaq üçün “Qarabağ” daha çox fürsət qazanacaqdı. Belədə rəqibin müdafiəsində daha çox boşluq, “Qarabağ”ın üçüncü qolu vurması üçün imkan yaranacağı da gözlənilən idi. Təəssüf ki, bu hesabı qorumaq mümkün olmadı. Daha çox ona təəssüflənirəm ki, hesab arasındakı fərqi minimuma endirməkdə isveçrəlilərə qarşılaşmanın hakimləri yardımçı oldu. Bunu mən demirəm, elə İsveçrə mətbuatı deyir. Sitat: “65-ci dəqiqədə Adrian Gerreronun cərimə zərbəsini yerinə yetirdiyi vaxt qol müəllifi Kamberi aşkar ofsaydda idi. Bunu epizodun təkrarına baxanda da görmək olur ki, Kamberi “Qarabağ”ın müdafiəçisindən bir addım irəlidədi. Lakin yan xətt hakimi 22 yaşlı müdafiəçinin öndə olduğunu görməyib”.
Belə yerdə heç əlavə şərhə də ehtiyac yoxdu. Yaxşı ki, İsveçrə mətbuatı ədalət hissini itirməyib, “Qarabağ”ın haqqının yeyilməsinə, “Sürix”in oyundankənar vəziyyətdən fərqlənməsinə biganə qalmayıb. Yavaş-yavaş bizim kimi avropalılar da UEFA-nın əməllərini daha yaxşı görür, “Qarabağ”a qarşı haqsızlıqlara öyrəncəli olurlar. O cümlədən də İsveçrədə çalışan idman jurnalistləri. Heç şübhə etmirəm ki, onlar da ötən ilin dekabrında başverənləri unutmayıblar. Onlar da yaxşı bilir ki, “Qarabağ” “Bazel”in qapısına “təmiz” qol vurmuşdu. Görüşün xorvatiyalı hakimləri qapı xəttini keçən topu görmədi. Daha dəqiqi, görmək istəmədilər. Bu dəfə Bosniyadan gələn “ədalət keşikçiləri” eyni fərasətlə oyundankənar vəziyyətdən vurulan qolu hesaba aldı, rəqibin fərqi azaltmasına şərait yaratdı. Həmin qol oyunun axarına bilavasitə təsir göstərdi.

“Xoşbəxtlikdən Çempionlar Liqasının təsnifat mərhələlərində VAR sistemi tətbiq olunmur” – bu sitat da İsveçrə mətbuatında yazılanlardandı. Deməli, Bakıdakı oyunun nəticəsi, minimalhesablı məğlubiyyət “Sürix” düşərgəsini xoşbəxt edib. Bu xoşbəxtlik ədalətsizlik nəticəsində qazanılsa belə, onlar bunu özlərinə dərd etmir. Qoy olsun. Biz də həmin axşam çox xoşbəxt idik. Amma isveçrəlilərdən fərqli bizi hakimin yanlış qərarları yox, Kadinin qarşısıalınmaz zərbəsi, Vacinin ildırım sürətinə bənzəyən cəldliyi, qol fürsətlərini əla dəyərləndirməsi xoşbəxt etmişdi. Bizi xoşbəxt edən komandamızın futbolçuları idi. İki xoşbəxtlik arasında yerdən göyə qədər fərq var. Onların xoşbəxtliyini haqsızlıq gətirib, bizimkini isə cəsarətli oyun, gözəl qollar və möhtəşəm qələbə. Ümid edək ki, növbəti həftə keçirilən cavab oyunundan sonra da daha çox xoşbəxt olan biz olacağıq... Çempionlar Liqasında yolumuza davam etdiyimizə, addım-addım böyük hədəflərə doğru getdiyimizə görə!

AMAL