"Ukrayna millisinin qapısından top keçirsəm, yəqin ki, bunu qeyd edəcəyəm"
“Sabah”ın yeni transferi Anatoli Nuriyev “FanDay” nəşrinə müsahibə verib.
"Football-plus.az" xəbər verir ki, Azərbaycan millisinin yarımmüdafiəçisi gələcəkdə Ukrayna yığmasına qol vuracağı təqdirdə, bunu qeyd edəcəyini söyləyib:
“Azərbaycan çempionatı ilə müqayisədə Ukrayna premyer-liqası daha gərgin keçir. Azərbaycanda texnikaya diqqət yetirilir, bütün komandalar daha çox topla oynamağı xoşlayır. Ukrayna klubları “Minay” və “Kolos”a nə vaxtsa qol vursam, təbii ki, sevinmərəm. Amma digər klubların, eləcə də Ukrayna millisinin qapısından top keçirsəm, yəqin ki, bunu qeyd edəcəyəm".
"Özünüzü daha çox ukraynalı, yoxsa azərbaycanlı kimi hiss edirsiz?”, sualını 26 yaşlı pleymeyker bu cür cavablandırıb:
“Çətin sualdı. Heç kimin xətrinə dəymək istəmirəm. Təbii ki, Ukrayna mənə daha yaxındı. Bu təəccüblü deyil, çünki orada doğulmuşam, 25 il yaşamışam. Ancaq beynəlxalq arenada çıxış etmək imkanına görə Azərbaycana minnətdaram. Elə futbolçu yoxdu ki, bunu arzulamasın. Mənim babam azərbaycanlı olub, ona görə də bu ölkənin millisində çıxış etməyimin anlamı var”.
Qeyd edək ki, Anatoli Nuriyev yay fasiləsində “Sumqayıt”dan keçdiyi “Sabah”la 3 illik müqavilə imzalayıb. O, ötən ildən Azərbaycan millisində çıxış edir.
Digər xəbərlər
