“Qarabağ” iyulun 30-da Avropa Liqasının 2-ci təsnifat mərhələsinin cavab oyununda ÇSKA-sının qonağı olacaq.

Bilindiyi kimi, “Tofiq Bəhramov”da keçirilən ilk matçda qolsuz “sülh”ə razılaşan “köhlən atlar”ı çətin səfər qarşılaşması gözləyir. Lakin ağdamlıların yeganə problemi rəqibin doğma meydanda, azarkeşləri önündə oynaması deyil. Çünki bugünlərdə matçın keçiriləcəyi stadionla da bağlı problem ortaya çıxıb.

“Football-plus.az”ın məlumatına görə, Sofiyadakı Vasil Levski Milli stadionunda 72 saat ərzində üç rəsmi oyun keçiriləcək. Bunlardan biri artıq baş tutub. ÇSKA dünən Plovdiv “Botev”ini qəbul edib. Daha bir matç bu gün olacaq. ÇSKA 1948 Konfrans Liqasında Trnava “Spartak”ını qəbul edəcək. Növbəti görüş isə ÇSKA ilə “Qarabağ” arasında olacaq.

“Topsport.bg” xəbər verir ki, bu durum idman qurğusunun ort örtüyünün vəziyyətinə mənfi təsir edəcək. Çünki bu qarşılaşmalardan əvvəl açıq məşqlər də olacaq. Kəsəsi, qazonun pis vəziyyətə düşməsi ehtimalı böyükdü. Hazırda ÇSKA rəhbərliyi bir neçə həftə əvvəl tam yenilənən ot örtüyünün yararsız hala düşəcəyindən qorxur.

KƏNAN BAHADIR