Türkiyə çempionatının son turunda ''Fənərbaxça''nın ''Göztəpə''ni 2:0 hesabı ilə məğlub etməsinin ardından sosial şəbəkələrdə qapıçı Altay Bayındırla bağlı maraqlı bir şəkil paylaşıldı.

Qolkiperə məxsus olduğu iddia edilən su şüşəsi istedadlı futbolçunun sirrini üzə çıxartdı. Qabın üzərində ''Göztəpə''li oyunçuların penaltini hansı künclərə vurduğu qeyd olunmuşdu. Sən demə ''Fənər''in qapıçısı hər qarşılaşmadan öncə rəqib komandanın üzvlərinin penalti statistikasını hazırlayır. Sonra da bunu su şüşəsinin üzərinə yapışdırır. Bayındırın sirrinin açılması və su şüşəsinin görüntülərinin ortaya çıxması sosial şəbəkələrdə müzakirələrə səbəb oldu.

Bəziləri 23 yaşlı qapıçını hər matça xüsusi hazırlaşması və rəqibləri analiz etməsinə görə təriflədisə, digərləri ''2-3 futbolçunun topu hansı küncə göndərəcəyini yadda saxlamaq bu qədərmi çətindi'' deyərək onu tənqid etdi. 2019-dan bu yana ''sarı-lacivərdlilər''in şərəfini qoruyan Altay bu mövsümün gedişində zədə üzündən 3 aydan çox meydana çıxa bilməyib. Buna rəğmən superliqada o, 19 görüş keçirib və bunların 7-də qapısını toxunulmaz saxlayaraq 17 qol buraxıb. Onun penalti statistikasına gəlincə, Bayındır bu mövsüm 3 penaltidən yalnız birini dəf edib.