Obradoviçin bostanına atdığım daş - KÖŞƏ
İki gün sonra 21 yaşadək futbolçulardan ibarət milli komanda Avropa çempionatının seçmə mərhələsində Estoniya ilə qarşılaşacaq.
Bu görüş bizim üçün çox vacibdi. Milan Obradoviçin komandası ölüm-dirim mübarizəsinə çıxır. Estonlar 0 xalla qrup sonuncusudular. Bizim isə hesabımızda 1 xal var. Hər iki komanda “Kapital Bank Arena”da sonuncu olmamaq üçün mübarizə aparacaq. Oyuna xüsusi yanaşan serbiyalı mütəxəssis Elvin Cəfərquliyev, Səbuhi və Rüfət Abdullazadələr, Musa Qurbanlı, Mərt Çəlik, Cəlal Hüseynov, Abdulla Xaybullayev, Pərviz Azadov, Ceyhun Nuriyev, Ədilxan Qarəhmədov, İsmayıl Zülfüqarlı, Emil Səfərov kimi daim premyer-liqada çıxış edən komandaların heyətlərində yer alan futbolçulara dəvət göndərib.
Yığmaya kimlərin çağrılması, kimlərin kənarda qalması ilə işim yoxdu. Mənim dərdim Obradoviçlədi. Hər dəfə açıqlamalarında, müsahibələrində deyir ki, bu futbolçular çempionat matçlarında oynamalıdılar. Onlara şans vermək lazımdı ki, yığmanın oyunlarında nəticə qazana bilək. Ötən gün serbiyalı mütəxəssisdən müsahibə götürdüm. Sual verdim ki, hazırkı oyunçular, demək olar ki, öz komandalarında əsas heyət üzvləridi, indi nəticə vermək vaxtıdı? Estoniyaya məğlub olsaq, bunu faciə adlandırmaq olar? Doğma meydanda uduzmaq Azərbaycan millisindəki karyeranıza təsir edəcək? Serbiyalının cavabı belə oldu:
“Baxın, xal qazanmaq mənim üçün heç nəyi dəyişməyəcək. Sadəcə, futbolçuların özgüvənini artıracaq. Bəlkə də səhv edə bilərəm. Mən 3 ildi burdayam. 40-dan çox futbolçunun xidmətindən yararlanmışam. Onların 13-ü milli komandaya dəvət alıb. Hədəfim həmin futbolçuların əsas yığma üçün yetişməsidi. Mənim komandamda çox oynamasalar da, olar. Bir daha söyləyirəm ki, vacib məsələ bu futbolçuları əsas yığma komandaya qazandırmaqdı. İşimdən ayrılmaqdan qorxmuram. İndiyə kimi qarşılaşdığımız komandaların - Fransanın, İsveçrənin, Xorvatiyanın, Norveçin baş məşqçiləri bizim futbolçuların gücündən bəhs ediblər. Azərbaycan millisinin təhlil etməyin çətin olduğunu bildiriblər. Onlar bizi ciddiyə alıb, komandamla görüşlərin vacib olduğunu qeyd ediblər. Bu, mənim fəlsəfəmdi. Bütün oyunlara fərq qoymadan necə hazırlaşdığımı görə bilərsiz. Mətbuat konfranslarında iştirak edəndə futbolçularımla bu barədə danışa bilərsiz. Ya özləri ilə əlaqə qurmaq sizin üçün problem olmaz. Onlardan mənim fəlsəfəmin nədən ibarət olduğunu öyrənə bilərsiz. Mənim nədənsə qorxum yoxdu. Çox çalışıb, işimi görüb, nəticə qazanmağa çalışıram. Əsas yığmaya qazandırdığımız futbolçular və başqaları ilə fəxr edirəm”.
Maraqlıdı: Obradoviçin həqiqətən adı çəkilən futbolçuların yetişməsində müstəsna rolu olub? Yenə deyirəm, yığmaya dəvət olunanların hamısı premyer-liqa matçlarında öz komandalarının heyətlərində çıxış edənlərdi. Təbii ki, klublar Azərbaycan futbolunun gələcəyini düşündükləri üçün həmin futbolçuları meydana buraxmırlar. AFFA “çempionat matçlarında 21 yaşadək oyunçu ilk “11-lik”də olmalıdı” qaydasını tətbiq etməsəydi, indi adını çəkdiyimiz şəxslər də olmayacaqdı. U-21 yığması bostan deyil ki, orda nəsə yetişsin. Federasiyanın bu tələbi olmasaydı, Obradoviç ağızdolusu “əsas yığmaya 13 futbolçu vermişəm” deyə bilərdi? Axı bu oyunçular Obradoviçin rəhbərliyi altında hansısa komanda ilə qarşılaşmada möhtəşəm oyun sərgiləməyiblər də. U-21, demək olar ki, 3 il ərzində bütün oyunlarda uzudub. Avropa çempionatının seçmə mərhələsində Finlandiya ilə doğma meydanda heç-heçə etmişik. Həmin görüşdə də qonaqlar açıq-aşkar üstün oyun sərgiləyirdilər. Mərt Çəlik, Cəlal Hüseynov, Elvin Cəfərquliyev, Toral Bayramov U-21-dəki oyununa görə əsas yığmaya dəvət alıb? Təbii ki, yox! Bu futbolçular öz klublarındakı çıxışına görə De Byazinin diqqətini cəlb edib. Yenə deyirəm, 21 yaşadək yığma komanda bostan deyil ki, burda nəsə yetişsin. Bura layiq olan futbolçuları dəvət edib, nəticə vermək lazımdı, cənab Obradoviç. Bütün oyunlarda məğlub olub, hər dəfə də “əsas yığmaya 13 futbolçu vermişəm” deməklə olmur. Həmin oyunçular Azərbaycan premyer-liqasında tətbiq olunan sistemin sayəsində ortaya çıxıblar. Başqalarının malını özününküləşdirmək peşəkarlığa yaraşmır. Yığmanın çalışdırıcısı Obradoviç yox, Qurbanov, Abbasov, Əliyev olsaydı da, bu futbolçular premyer-liqada olacaqdılar. Başqa bostanlara daş atmaq əvəzinə işinizi görün, ölkəyə qələbə bəxş edin. Bəhanə axtarmayın. Bostan bar verir, bostançı malı zay edirsə, fermer ona iki mövsümdən artıq dözmür, cənab Obradoviç!
İLKİN SULTANLI
Digər xəbərlər
