Novruz xalqımızın ən qədim bayramlarından birincisidi.

Min illərdi Azərbaycan xalqı fevralın sonundan martın 22-nə kimi şadyanalıq edir. Amma bu dəfə bayramı o qədər də yaxşı qeyd edə bilmədik. Ölkədə yaz yox, qış havasının hökm sürməsi əhval-ruhiyyəni korladı. Qanımızı qaraldan təkcə soyuq günlər olmadı. Millinin baş məşqçisi Canni de Byazi də bayramın ona dəxlinin olmadığını deyib, yığma üzvlərini Maltada toplayır. Burda 2 yoldaşlıq görüşü keçirib, komandanı Millətlər Liqasına hazır vəziyyətə gətirəcək. Rəqiblər isə “adlı-sanlı” Malta və Latviya yığmalarıdı. Millimiz bu komandalarla görüşdə gücünə güc qatacaq, onları məğlub edib, Azərbaycan xalqının bayramına bayram qatacaq.

Yığmaya çağırılan futbolçulara da söz ola bilməz. 25 nəfərin orta yaş həddi 28,0-di. “Qarabağ”ın heyətində 2-3 görüşə çıxan Riçard Almeyda, uzun sürən zədədən sonra “Zirə” ilə matçda yaşıl meydana qayıdan Bədavi Hüseynov, Hamidu Keyta gələndən sonra “qartallar”ın heyətində o qədər də parlaq oyun sərgiləməyən Ağabala Ramazanov, 2-ci bundesliqada son pillədə qərarlaşan "Ertsgebirge”nin üzvü Dmitri Nazarov. Düzdü, heyətdə kifayət qədər yaxşı futbolçular da var. Eddi İsrafilov. Emin Mahmudov, Azər Salahlı, Maksim Medvedev, Qara Qarayev, Ramil Şeydayev, Renat Dadaşov, Aleksey İsayev və başqaları yaxşı formadadı, milliyə xeyir verə bilərlər. Bəs Riçard, Bədavi və Dmitrinin nə işi var yığmada? De Byazi yaşlıları niyə doldurub heyətə? Bu gün keçirilən mətbuat konfransında ona bu sualı ünvanlayıblar. Deyib ki, yaxşı nəticə əldə etmək üçün həmin futbolçuları dəvət etmişəm. Yəni bu oyunçular olmayanda yığma nəticə qazana bilmir? Məsələn, 60-cı dəqiqədən sonra meydanda təngnəfəs olan Almeyda, Ramazanov və Nazarov komandaya fayda verəcək? Yoxsa Qurban Qurbanov kimi mütəxəssisin ehtiyacı olduğu zaman belə meydana buraxmadığı Bədavi müdafiədə keçilməz olacaq? Onların təcrübəsindən istifadə etmək istəyirsənsə, niyə Millətlər Liqasının, dünya çempionatının seçmə mərhələ oyunları zamanı dəvət etmirdin?

Yəqin bilirsiz, klubların Antalyadakı toplanışında De Byazi işitrak etmədi. Onu Benito Karbone əvəz etdi. İtaliyalı 10-12 gün ərzində Bədavi, Riçard və Höccətlə görüşərkən uzun-uzadı səmimi söhbət edir, zarafatlaşırdı. Görünür, bu dostluq münasibəti onların milliyə yolunu açıb. Mən buna başqa ad tapa bilmirəm. Yoxsa premyer-liqanın 4-cü pilləsində qərarlaşan “Qəbələ”nin heyətində özünü yaxşı tərəfdən göstərən Rövlan Muradovla Murad Musayev niyə yığmaya çağrılmasın? Başa düşdük ki, “qırmızı-qaralar”ın müdafiəçisinin sənədində problem var. Amma siz onu yığmaya dəvət etsəydiz, bu məsələni həll etmək AFFA üçün problem olmazdı. Asif Məmmədov da yaşlıdı. Sizin istədiyiniz səviyyədə çıxış edə bilməz? Aha, ilişdik. Bu bəhanə keçmədi.

Cənab De Byazi, yəqin ki, Türkiyə millisinin baş məşqçisi Ştefan Kuntsu tanıyırsız. Neçə gündü Türkiyə mediası almaniyalını tənqid edir ki, “Fənərbaxça”nın gənc futbolçusu Arda Güləri niyə yığmaya çağırmırsan? Təcrübəli mütəxəssis də deyib ki, öz klubunda normal oynamayanın millidə nə işi var? Özü də Portuqaliya ilə vacib görüş ərəfəsində. İndi mənə maraqlıdı, Maltadakı təlim-məşq toplanışı Millətlər Liqası üçün vacibdisə, öz klublarında lazımi oyun praktikası qazanmayan futbolçuların millidə nə işi var? Bayram olduğu üçün dostunuzun xətrinə dəyməmisiz? Karbonenin xahişindən keçə bilməmisiz? Yoxsa “Novruzda küsülülər barışar” adətindən yararlanıb, Ağabala Ramazanov, Dmitri Nazarovla barışmaq istəyirsiz?

İLKİN SULTANLI