Millimiz bu gün “FİFA Series” beynəlxalq turnirinin ikinci oyununda Syerra Leone yığmasını qəbul edəcək. Mehdi Hüseynzadə adına Sumqayıt şəhər stadionda keçiriləcək matç saat 19.00-da başlayacaq.

Bilindiyi kimi, Sent Lüsiya ilə oyun da bu stadionda keçirildi. Düzdü, həmin gün ölkə ərazisində, eləcə də Sumqayıtda yağışlı hava şəraiti hökm sürürdü. Ancaq indi mülayim hava şəraiti var.

Bəs, budəfəki oyuna nə qədər bilet satılıb? AFFA-nın Mətbuat və İctimaiyyətlə Əlaqələr departamentinin rəhbəri Murad Axundov “Football-plus.az”a verdiyi məlumata görə, indiyə qədər təxminən 3000 bilet sahibini tapıb. Oyunun başlayacağı vaxta qədər sayın artması gözlənilir.

Artmalıdı! Ona görə ki, Syerra Leone asan rəqib deyil və martın 27-də tarixinin ən böyükhesablı qələbəsini qazanan millimiz bu matçda da qalib gəlməklə uğurlarını davam etdirməlidi. Odu ki, bir neçə dəqiqə sonra “Mehdi Hüseynzadə” istiqamətində yola düşməkdə fayda var, əziz futbolsevərlər! Millimizin yanında olaq!

Xatırladaq ki, adıçəkilən idman qurğusunun tamaşaçı tutumu 9502 yerlikdi.

KƏNAN BAHADIR