"Sabah" Çempionlar Liqasının 1-ci təsnifat mərhələsində "Nyu Seynts"ə qalib gəldi - 2:0.

"Football-plus.az" xəbər verir ki, "bayquşlar"ın baş məşqçisi Valdas Dambrauskas oyunsonrası mətbuat konfransında jurnalistlərin suallarını cavabladı.

- Oyunçularımı, Azərbaycan futbolunun azarkeşlərini Çempionlar Liqasındakı ilk qələbə münasibətilə təbrik edirəm. Çox çətin oyun alındı. Biz bunu toplanışda oyunçularla danışarkən bilirdik. Deyirdim ki, daha çox dərin müdafiə olunan komandalara qarşı çıxış edəcəyik. Belə rəqiblərlə oyunda daha çox səbrli olmalısan. Çox məmnunam. Amma bu hələ heç nə demək deyil. Bizi çətin səyahət gözləyir. Süni meydançada oynayacağıq. Sonuncu dəqiqələrdə təəssüf ki, Stiv Solvet qırmızı vərəqə aldı. Cavab matçında oynaya bilməsə də, kifayət qədər oyunçularımız var ki, onu əvəzləyə biləcək. Səfərdə diqqətli olmalıyıq. Rəqib iki qol geridədi, fərqi aradan qaldırmaq üçün burdakı kimi oynamayacaq. Daha çox irəli atılacaq. Belədə boşluqlar verəcəklər ki, bundan yararlanmağa çalışacağıq.

- Solvetin qırmızı vərəqə alması cavab oyununda sizə nə dərəcədə çətinlik yaradacaq?
- Görəcəyik... Ötən mövsüm bəzi oyunlarda Solvetsiz çıxış etmişik. O, bizim üçün önəmli oyunçudu, fantastik insandı. Onsuz bizə çox ağır olacaq. Çalışacağıq ki, bunun öhdəsindən gələk. Ehtiyatda onu əvəz edəcək iki oyunçu var. Ümumiyyətlə, ehtiyat oyunçular skamyasında keyfiyyətli futbolçular var. Oyuna sonradan daxil olanlar da bunu göstərdi.

- Daha böyükhesablı qələbə qazanmaq şansınız var idi. 2:0 hesabı nə dərəcədə risklidi?
- Daha çox qol vurmaq istəyərdik. Amma 2:0 da yaxşı hesabdı. Komandamdan daha çox qol gözləyirdim. İnanıram ki, səfərdə bunu bacaracağıq. Rəqib risk alacaq. Cəsarətli oynayacaqlar. Boşluqlardan yararlanmalıyıq.

- Stiv Solvetə göstərilən qırmızı vərəqəyə görə veriləcək cəzanın təxirə salınması üçün UEFA-ya müraciət etməyi planlaşdırırsız?
- Bizim prezidentimiz İlham Əliyevdi. Azərbaycanda bütün futbol qaydalarına riayət edilir. Heç bir şeyə müdaxilə edilmir. Fikrimcə, hər lider işi ilə məşğul olmalıdı.

- Bir həftə ərzində yeni transferlər baş tuta bilər?
- Bu barədə danışmaq üçün tezdi. Səfər oyununda daha çox bərpa prosesinə fikir verəcəyik. Oyunçular daha yaxşı hazırlaşmalıdı. Hazırda orda kimlərin oynayacağını demək üçün tezdi. Bizdə iş heç vaxt dayanmır. Bizim üçün ən önəmlisi Uelsdəki oyuna köklənməkdi. Daha sonra növbəti rəqibə köklənəcəyik. Zədələr də ola bilər. Ümid bəslədiyimizdən də aşağı şəkildə çıxış edə bilərik. Belədə daha yaxşı oyunçu gətirməyə çalışacağıq. Komandamızın kifayət qədər potensiallı oyunçuları var. Bunun üzərində də işləməliyik.

- Rəqib baş məşqçi daha çox uzun yoldan şikayətləndi. Siz də səfər görüşü üçün uzun yol qət edəcəksiz. Bu sizin üçün nə dərəcədə problem yaradacaq?
- Bəli, biz də uzun yol gedəcəyik. Süni meydançada oynayacağıq. Bu bir çağırışdı və bunu qəbul etməliyik. Elə etməliyik ki, heç bir bəhanəmiz olmasın.