Portuqaliya çempionatında gərgin çempionluq mübarizəsi davam edir.

''Football-plus.az'' xəbər verir ki, 33-cü turda böyük maraqla gözlənilən Lissabon derbisi baş tutdu. Tura eyni xalla daxil olan iki komanda - ''Benfika'' ilə ''Sportinq'' üz-üzə gəldi.

''Benfika'' doğma meydanda oynadığından favorit hesab olunurdu. Türkiyə yığmasının iki üzvü - Orkun Kökçü və Kərəm Aktürkoğlunun şərəfini qoruduğu ''qartallar'' qalib gələcəyi təqdirdə son tura lider kimi daxil olacaqdı. Amma Bruno Lajenin komandası ümidləri doğrultmadı.

Oyun qonaqların qolu ilə start götürdü. 4-cü dəqiqədə Trinkao hesabı açdı. ''Benfika'' bu nəticə ilə barışmaq istəməyərək hücumlarını davam etdirdi. Amma bu komandanın gücü yalnız məğlubiyyətdən qurtulmağa yetdi. 63-cü dəqiqədə Kərəm Aktürkoğlu səhnəyə çıxdı. Türkiyəli ulduz yekun nəticəni müəyyənləşdirdi. 1:1 hesabı daha çox ''Sportinq''i sevindirdi. Çünki ilk dövrədə öz meydanında minimal hesabla qalib gələn bu komanda şəxsi oyunlarda üstündü.

İndi ''Sportinq'' son turda evdə ''Gimaraynş''ı məğlub edəcəyi təqdirdə ardıcıl 2-ci, tarixində isə 21-ci çempionluğunu qazanacaq. ''Benfika'' yalnız səfərdə ''Braqa''nı yenməli və ''Gimaraynş''ın möcüzə edəcəyinə ümid bəsləməlidi.

Qeyd edək ki, Lissabon nəhəngləri mayın 25-də ölkə kubokunun finalında da üz-üzə gələcək. Titul qazanıb-qazanmamağından asılı olmayaraq Portuqaliyadakı ilk mövsümü Kərəmin aktivinə yazmaq olar.

Ötən yay ''Qalatasaray''dan 12 milyon avroya transfer olunan və qısa müddətdə ''Benfika''nın liderlərindən birinə çevrilən 26 yaşlı vinger bu mövsüm 47 rəsmi qarşılaşmada 15 qol, 12 məhsuldar ötürməlik əla performans sərgiləyib.