Çempionlar Liqasında pley-offun cavab oyunu çərçivəsində keçirilən ''Benfika'' - ''Monako'' qarşılaşması çox dramatik alındı.

''Football-plus.az'' xəbər verir ki, ''Benfika'' ötən həftə səfərdə bu rəqibi minimal hesabla yenmişdi. Cavab matçı Türkiyə yığmasının üzvü Kərəm Aktürkoğlunun qolu başladı.

Portuqaliya karyerasına möhtəşəm start verdikdən sonra bir qədər eniş yaşayan və bəzi matçlarda ehtiyatda qalan Kərəm 2025-ci ildə ilk dəfə qol sevinci yaşadı. O həm də ÇL-də debüt etdiyi ötən mövsümün əvvəlindən bu yana bu turnirdə ən çox (6) qol vuran türkiyəli futbolçudu. ''Monako'' özündə güc taparaq əzmkarlıq nümayiş etdirməyi bacardı. Komanda qalan müddətdə hətta iki dəfə hesabda önə də keçdi. Amma ''Benfika'' hər iki halda bərabərlik qolunu vurmağa müvəffəq oldu.

3:3 bitən görüşdə ''Qartallar''ı məğlubiyyətdən Türkiyə yığmasının digər üzvü Orkun Kökçü xilas etdi. Bu mövsüm artıq ikinci dəfə ÇL matçında ''Benfika''nın heyətində hər iki türkiyəli futbolçu fərqlənməyi bacardı. Daha öncə bu, əsas mərhələdə ''Atletiko'' ilə ev oyununda (4:0) yaşanmışdı.

Beləliklə, ''Benfika'' iki oyunun nəticəsinə görə 4:3 üstün olaraq 1/8 finala vəsiqə qazandı.

ƏLİ