Portuqaliya çempionatının 27-ci turunun son oyununda ''Benfika'' ''Farense''ni qəbul etdi.

''Football-plus.az'' xəbər verir ki, oyuna Lissabon nəhənginin türkiyəli vingeri Kərəm Aktürkoğlu damğa vurdu. ''Sportinq'' ilə amansız çempionluq mübarizəsi aparan ''Benfika'' ilk 23 dəqiqədə 2 topluq üstünlük yaxaladı.

Kərəm əvvəlcə 7-ci dəqiqədə özü fərqləndisə, çox keçmədən Pavlidisin fərqlənməsinə şərait yaratdı. Qonaqlar fasilə ərəfəsində qollardan birinin əvəzini çıxdılar. Amma ikinci hissənin əvvəllərində yenə Kərəm səhnəyə çıxdı. 26 yaşlı futbolçu komandasının 3-cü, özünün 2-ci qolunu vurdu.

Qalan müddətdə ''Farense'' fərqi yenidən minimuma endirsə də, xal qazana bilmədi. Beləliklə, 3:2 üstün olan ''Benfika'' çempionatda ardıcıl 8-ci qələbəsini qazandı. Sona 7 tur qalmış hər iki Lissabon nəhənginin aktivində 65 xal var.

Növbəti tur ''Sportinq'' 4-cü pillədəki ''Braqa''nı qəbul edəcəksə, ''Benfika'' 3-cü pillədəki ''Portu''nun qonağı olacaq. Kərəm 26-cı turda ''Riu Ave'' ilə səfər oyununda (3:2) da komandasının qələbə qolunun müəllifi olmuşdu. Türkiyə yığmasının üzvü Portuqaliya karyerasında ikinci dəfə bir oyuna ən azı iki qol vurmağı bacardı.

Ümumilikdə bu mövsüm onun aktivində 41 rəsmi oyunda 14 qol var.