“Hazırda onun möqeyində çox güclü rəqabət var”
İstər şərait, istərsə də maliyyə baxımından premyer-liqa təmsilçilərinin Gürcüstan klublarını üstələdiyi heç kimə sirr deyil.
Qonşu ölkədə yalnız Tiflis “Dinamo”su və Batumidən olan adaşı dayanaqlı büdcə və infrastruktur baxımından Azərbaycan klubları ilə ayaqlaşa bilər. Məhz bu səbəbdən gürcü futbolçular Azərbaycan klublarında oynamağa, legioner həyatı yaşamağa həvəslədi. Çox olmasa da, bəzən bizim oyunçular da qonşu ölkəyə yollanır. Buna nümunə kimi artıq karyerasını başa vuran Nicat Qurbanovu, qış fasiləsinə qədər “Sumqayıt”ın şərəfini qoruyan, hazırda isə klubsuz qalanVüqar Bəybalayevi göstərmək olar. Nicat 2019-21-ci illər aralığında “Samtredia”nın şərəfini qorumuşdusa, Vüqar 2021-də “Telavi”yə üz tutmuşdu.
Qış fasiləsində "Sabah"ın futbolçusu Abdulla Xaybulayev də karyerasını Gürcüstanda davam etdirmək qərarına gəlib. 21 yaşlı yarımmüdafiəçi "Samtredia"ya keçib. U-21 millimizin üzvü Gürcüstan təmsilçisində icarə əsasında çıxış edəcək. Onu da qeyd edək ki, Abdulla cari mövsümdə "Sabah"ın heyətində 4 oyunda meydana çıxıb. Maraqlıdı, futbolçu niyə Gürcüstanda oynamaq istəyib? “Bayquşlar”ın onu yerli klublaradan birinə yox, məhz “Samtredia”ya icarəyə verməsinin səbəbi nədi? “Sabah”ın mətbuat katibi Elnur Həmidovun suallarımıza cavabı belə oldu:
“Bildiyiniz kimi, yay fasiləsində bir neçə gənc futbolçumuz premyer-liqanın bəzi komandalarına icarəyə göndərilmişdi. Bu addımı atmaqda əsas məqsəd onların oyun təcrübəsi qazanması idi. Hazırda həmin futbolçuların əksəriyyəti klublarında daim oynamaq şansı qazanır və inkişafları nəzərə çarpır. Abdulla Xaybulayev U-21-in üzvüdü. Artıq bir neçə ildi “Sabah”ın formasını geyir. Əvvəllər U-19-da və əvəzedici heyətdə oynayıb. Bununla yanaşı, əsas komandamızın heyətində premyer-liqada debüt imkanı da qazanıb. 4 qarşılaşmada meydanda olub. Lakin hazırda onun möqeyində çox güclü rəqabət var. Gürcüstan “Samtredia”sından təklif gələndə futbolçunun daha çox oyun təcrübəsi qazanmaq perspektivini nəzərə aldıq. Abdulla özü də daha çox oyun təcrübəsi qazanmaq istədiyindən yeni çağırışa müsbət yanaşdı. Artıq “Samtredia”nın düşərgəsindədi. İcarə müqaviləsinin müddəti bu ilin dekabrına kimidi”.
Sonda onu da qeyd edək ki, İmeretiya bölgəsindəki eyniadlı şəhəri təmsil edən klub cari mövsümdən güclülər dəstəsində mübarizə aparacaq.
RƏŞAD
Digər xəbərlər
