Bu gün "Neftçi"nin tanınmış futbolçularından olan Rəşid Özbəyovun doğum günüdü.

Yaşasaydı, 70 yaşını qeyd edəcəkdi. Amma Özbəyov 2001-ci il sentyabrın 16-da - 48 yaşında ürəktutmasından dünyasını dəyişib. Futbolumuzun ən görkəmli nümayəndələrindən birini onun komanda yoldaşı olmuş Asəf Namazovla söhbətdə xatırladıq.

- Rəşid Özbəyovla uzun illər çiyin-çiyinə "Neftçi"də oynamısız. Komanda yoldaşınız haqda fikirləriniz maraqlıdı...
- Əvvəlcə onu deyim ki, son iki ildə komanda yoldaşlarımdan daha üçü - Füzuli Cavadov, Səmədağa Şıxlarov və Elbrus Abbasov dünyasını dəyişib. Bizim nəslin futbolçuları ilbəil azalır. Rəşidə gəlincə, çox döyüşkən futbolçu olub. O, sol cinah müdafiəçisiydi, həm sürətli, həm də aqressiv futbol oynayardı. İndiki futbol diliylə desək, fola yaxın oyunçu idi. Buna rəğmən, mövqeyində fəal, komandası üçün maksimum döyüşkən və təslim olmağı sevməyən futbolçuydu. Daim Azərbaycan futboluna sədaqətlə xidmət edib.

- Özbəyovla bir yaş fərqiniz var. "Neftçi"yə eyni vaxtda gəlmişdiz?
- Rəşid "Neftçi"yə məndən bir il əvvəl qoşulmuşdu. O vaxt SSRİ-də hər il 15-17 yaşlı futbolçular arasında "Ümid kuboku” keçirilirdi. Yarışda ittifaq respublikalarını yığmaları çıxış edirdi. 1971-ci ildə final mərhələsi Bakıda keçirildi və gənclərdən ibarət yığmamız bütün rəqiblərini üstələyərək turnirin qalib oldu. Yarışda özünü yaxşı tərəfdən göstərənlərdən biri də Özbəyov idi. Elə həmin il Rəşidlə Səmədi (Səməd Qurbanovu nəzərdə tutur – red.) "Neftçi"yə dəvət etdilər. Onlar ilk vaxtlar əvəzedici komandada oynamağa başladılar. 1973-cü ildən mən də "Neftçi"yə qoşuldum və Rəşidlə tanışlığımız, yoldaşlığımız başladı.

- Rəşid Özbəyovun "Neftçi"yə çox bağlı olduğunu deyirlər. Həqiqətən elə idi?
- Bəli. O karyerası boyunca ancaq "Neftçi"də çıxış etdi. 12 il ərzində Bakı təmsilçisində 300-dən çox oyunda iştirak etdi və 4 qol vurdu. Daha çox oynaya bilərdi, amma 1983-cü ildə Kutaisi "Torpedo"suyla matçın ilk dəqiqələrində aldığı zədə karyerasını bitirməklə nəticələndi (həqiqətən də 1983-cü il iyunun 24-də Bakıda keçirilən oyunun artıq 9-cu dəqiqəsində zədələnən Özbəyov Mixaylevski ilə əvəzlənib və bir daha ağ-qara formada görünməyib – red.).

- Bəs onu baş məşqçi kimi necə xarakterizə edərdiz?
- Müəyyən dövrlərdə Qazaxın “Göyəzən”, Ağdamın “Qarabağ”, Lənkəranın “Xəzər”, Maştağanın “Nicat”, Sabirabadın “İnşaatçı” və Buzovnanın “Xəzri” komandalarında baş məşqçi kimi çalışdı. Sonra səhv etmirəmsə, 3 il "Kəpəz"də Mehman Allahverdiyevin köməkçisi oldu. Elə məşqçi kimi uğurlarını da Gəncə təmsilçisində qazandı. Həmin dövrdə "Kəpəz" iki dəfə ölkə çempionu və kubokun qalib oldu. Həmçinin avrokuboklarda da çıxış etdilər. Düşünürəm ki, Rəşid Özbəyov baş məşqçi yox, köməkçi məşqçi kimi daha effektli idi.

- Yaşıl meydandan kənarda necə biri idi?
- Hamının hörmətini saxlayardı. Amma məsafəni gözləyən biriydi. Yəni çox qaynayıb-qarışmaz, öz işiylə məşğul olardı. Heç kimə pislik etməzdi. İşi-gücü ancaq futbol idi. Boş vaxtını da ailəsinə ayırardı. İçkidən və bir çox pis vərdişdən uzaq olsa da, özünə baxan da deyildi. Vaxtında qidalanmaz, xəstələnəndə özünə fikir verməz, zamanı gələndə həkim müayinəsinə getməzdi. Elə buna görə də hansı xəstəliklərinin olduğunu bilmədi. Bir də eşitdik ki, dostlarıyla saunada olarkən ürəktutmasından canını tapşırıb. Həmin vaxt İranda baş məşqçi işləyirdim deyə, dəfninə çata bilmədim. Həm futbolçu, həm baş məşqçi, həm də insan kimi ömrü çox qısa oldu. Amma bu qısa ömründə futbolsevərlərin yaddaşında sürəti, aqressivliyi və döyüşkənliyi ilə "Neftçi" üçün çarpışan Rəşid Özbəyov qaldı.

ABDULLA İSMAYILOĞLU