“Everton”un iztirabları davam edir: təhlükəli zonada qərarlaşan klub bazar ertəsi Frenk Lempardı qovdu və ona təcili varis axtarır.

Bütün bunlar azmış kimi, çərşənbə axşamı daha bir arzuolunmaz hadisə baş verdi. Tam razılaşdırılan müqavilə pozuldu. “Everton” “Vilyarreal”ın niderlandlı hücumçusu Qruneveldin transferini razılaşdırmışdı, yarımilliyə icarəyə götürürdü. Forvard həftəsonu zəruri tibbi müayinələrdən keçdi və hətta klub mediası üçün çəkildi.

Gözlənilirdi ki, “Everton” çərşənbə axşamı Arno Dancumanın transferini elan edəcək. Ancaq elə həmin gün futbolçu Londona yollandı – “Tottenhem” onun “saqqızını oğurladı”. Bəli, Liverpulda tibbi müayinədən keçəndən sonra! “The Guardian” yazır ki, niderlandlı son anda İngiltərə Futbol Assosiasiyasına göndəriləsi sənədi doldurmaqdan boyun qaçırıb – “Everton”dakı qeyri-müəyyənlik onu qorxudub. “Sky Sports” isə əlavə edir ki, Qruneveld premyer-liqada 19-cu yerdə olan komandaya keçidə razılıq verəndə hara gedəcəyini bilirdi. Məhz “Everton” naminə daha sərfəli təklifləri rədd etmişdi. Odu ki, hər şey Lempardın istefası ilə bağlıdı. Məhz sabiq baş məşqçi Arnonun “Everton”a transferində israrlı idi. “Tottenhem”dən yazan insayderlərin dediyinə görə, Lempard qovulandan sonra futbolçunun agenti London klubu ilə təmasa keçib və hücumçunun xidmətini təklif edib.

Qruneveld ötən mövsüm “Vilyarreal”ın lideri idi: Emeri onu təmiz hücumçu mövqeyinə keçirmişdi və niderlandlı bütün turnirlərdə 16 qol vurmaqla komandanın bombardiri olmuşdu. İspaniyanın kiçik şəhərciyinin təmsilçusu ÇL-in yarımfinalına qədər irəliləmişdi. Bu uğurlar fonunda top-klubların onun xidmətində maraqlı olması təbii idi. Hələ yazda “Liverpul”un adı çəkilirdi. Ancaq Arno bu mövsüm bir qədər söndü: La Liqada yalnız “Osasuna” ilə oyunda dubl edib, Konfrans Liqası ilə İspaniya kubokunun da hər birində iki qol vurub. Bu il isə ehtiyat oyunçular skamyasının daimi sakinidi (çempionatda 1 dəqiqə oynayıb). Əlbəttə, “Vilyarreal” ilyarım əvvəl “Bornmut”dan 23,5 milyon avroya aldığı Qruneveldin satışında maraqlıdı. İspaniya klubu ən azı ödədiyini çıxarmaq istəyir. Qışda “Everton”la yanaşı, “Bornmut”a dönmək variantı da var idi. Liverpul klubu və Lempard daha ciddi maraq göstərirdi. “Everton” hücumu gücləndirməyə ciddi ehtiyac duyurdu – Kalvert-Lüin və Mope premyer-liqaya hərəyə bir qol vurub. Ancaq indi Qruneveld də əldən çıxdı.
“Everton”un problemi bu transferin pozulmasıyla məhdudlaşmır. “Nyukasl” da gənc hücumçu Entoni Qordonun arxasınca düşüb. “Everton”un öz yetirməsi olan, Liverpulda doğulan futbolçuya görə “Çelsi” yayda nəhəng para təklif edirdi (60 milyon funtdan artıq). Ancaq Qordon doğma klubda qaldı. Düzdü, “Everton” azarkeşləri Entonidən də narazıdı. Bir müddət əvvəl onlar futbolçunun maşınını mühasirəyə alaraq “sən bu futbolkanı daşımağa layiq deyilsən” qışqırırdılar. Yəqin ki, Liverpuldan olan oğlana yerli azarkeşlərdən belə tənə eşitmək xoş deyil. Onda hətta Lempard da Qordonun müdafiəsinə qalxdı – baş məşqçi azarkeşlərdən belə hərəkət etməməyi xahiş etdi. Ancaq “transfer pəncərəsi”nin açılmasıyla Qordonun klubu dəyişə biləcəyi ilə bağlı şayiələr gücləndi. Deyilənə görə, bu satış qış transferləri üçün pula ehtiyac duyan “Everton”un da marağındadı. “Nyukasl” hələ ki özünü hamıdan fəal göstərir, ancaq “Çelsi” də bu işdə var. Klublar hələ ki gənc oyunçunun qiyməti ilə bağlı razılığa gələ bilməsə də, “Sky Sports” belə hesab edir ki, 40 milyon məbləği “Everton”u tam qane edir. Məhz Qruneveld Qordona ideal əvəzedici ola bilərdi, amcaq son nəticədə Liverpul klubu nəinki birindən, hətta ikisindən də əlini üzmək perspektivi ilə qarşılaşıb. Odu ki, Ceymi Karragerin bugünlərdə “Everton”u “ölkənin ən pis idarə olunan klubu” adlandırması tam yerinə düşür.