Rövşən Hüseynli “Araz-Naxçıvan”ın təklifinə “yox” deyib
Rusiya "Torpedo"sundan ayrılandan sonra "Araz-Naxçıvan"a qayıdan futzal millimizin qapıçısı Rövşən Hüseynli yenidən bu komandanın uğurları üçün çalışacaqdı.
Lakin baş məşqçi Joze Alesio da Silva ilə aralarında yaranan gərginlik buna imkan vermədi. Klub rəhbərliyi münasibətləri qaydaya samağa çalışsa da, cəhdlər uğursuzluqla nəticələndi. Bu üzdən Rövşən yenidən klubunu dəyişdi. Milli üzvü oktyabrdan etibarən Qazaxıstan "Atırau"sunun şərəfini qoruyur. "Araz-Naxçıvan" onu 2 aylıq icarəyə vermişdi. Hüseynli yeni klubunda da əvəzedilməzlərdən sayılır. Hətta son oyunların birində qol vurmağı da bacarıb.
Bir müddət öncə ondan Qazaxıstandakı durumu ilə bağlı müsahibə almışdıq. İcarə müddəti başa çatan Rövşən "Atırau"dan yeni müqavilə təklifi aldığını söyləmişdi. Bütün bunları nəzərə alaraq dünən təcrübəli qapıçı ilə əlaqə saxladıq. Görəsən, başqa hansı təkliflər alıb? Yenidən "Araz-Naxçıvan"a qayıtmaq ehtimalı var? Özü bunu istəyirmi? Hazırda çıxış etdiyi klubda vəziyyət necədi?
Hüseynlinin suallara cavabına keçid alaq:
"Komandada vəziyyət çox yaxşıdı. Çünki mövsümün əvvəlində qarşıya qoyulan məqsədə çatmışıq, hətta üstün nəticəyə imza atmışıq. Rəhbərlik və məşqçilər heyəti çıxışımdan razı qaldığını bildirib. Mən komandaya yeni qoşulanda "Atırau"nun 6 oyuna 1 qələbəsi və 5 məğlubiyyəti var idi. Komanda bu göstərici ilə 9-cu yerdə idi. Komanda ilə keçirdiyim 12 oyunda 6 qələbəmiz oldu, 1 heç-heçə etdik və 5 dəfə məğlubiyyətə uğradıq. Birinci dövrəni 22 xalla 5-ci yerdə bitirdik. Məncə, statistika da komandaya necə təsir etdiyimi göstərir. Bəli, son oyunda qol vurmaqla yadda qaldım. Bu da mənim üçün xüsusi oldu. Ümumiyyətlə, burda daha çox önə çıxıram. 5-ci oyunçu kimi oynayıb komandanın hücumlarında çıxış edirəm. Fikrimcə, yaxşı da alınır. Komandanın vurduğu 7-8 qolda birbaşa rolum olub. Bu da mənə daha cox inam verir və bir az da inkişaf edib təcrübə toplamağımda kömək olur”.
Rövşən sözlərinə belə davam etdi:
“Bəli, təkliflər var idi. Əvvəl də dediyim kimi, hazırda çıxış etdiyim komanda ilə yanaşı, başqa klublardan da maraqlanan olmuşdu. Əlbəttə, "Araz-Naxçıvan" da geri qayıtmağımla bağlı təklif etmişdi. Ancaq mən karyeramı "Atırau"da davam etdirmək istədim. Bununla bağlı "Araz-Naxçıvan" rəhbərliyi ilə danışığımız olmuşdu. Hazırda Bakıdayam. Yenə də görüşümüz oldu və razılığa gəldik. Mövsümün sonuna qədər "Atırau" ilə müqavilə bağladım. Mənə bu şəraiti yaratdığına və dəstək olduğuna görə "Araz-Naxçıvan" rəhbərliyinə minnətdarlığımı bildirirəm. Məqsədim orda yaxşı nəticə qazanmaq , milli komandaya daha çox xeyir vermək və Azərbaycan futzalını layiqincə təmsil etməkdi".
ŞAİR ABDULLA
Digər xəbərlər
