Gənclər və İdman Nazirliyinin ilin yekunlarına həsr olunmuş qala mərasimi keçirilir.

Tədbirdə "Qarabağ"ın prezidenti Tahir Gözəl də iştirak edir. O, mərasimdə jurnalistlərin suallarını cavablandırıb:

- İlk olaraq 2022-ci ili "Qarabağ" üçün dəyərləndirərdiz...
- Müsbət qiymətləndirirəm, gözəl dəyərləndirirəm. İstədiyimiz bütün hədəflərimizə nail olmadıq, amma "Qarabağ" oynadığı oyun ruhu ilə Azərbaycanın sevgisini, hörmətini qazanıb və ölkənin cəsarətli ruhuna ilham verib. Klubumdan çox razıyam.

- 2023-cü ildən gözləntilər nədi?
- Əlbəttə, ölkə çempionluğu. Konfrans Liqasında "Qarabağ"dan uğurlar gözləyirəm. İnanıram ki, gözəl nəticələr əldə edəcəyik.

- Kadi Borqesin "Krasnodar"la razılaşmağa yaxın olduğu bildirilir. Bu haqda nə deyə bilərsiz?
- Bu, bizim üçün sevindirici haldı. Artıq "Qarabağ"ın oyunçuları dünyanın gündəmindədi. Klub öz adıyla, futbolçuların bir sonrakı mərhələyə getməsi üçün xaricdə bir vasitə olub. Bunu müsbət qiymətləndirirəm. "Krasnodar"ın ciddi istəyi, arzuları var. Müəyyən məbləğlər var. Danışıqlar gedir. Futbolçunu arzusu olmadan bir yerdə saxlamaq çox çətindi. Şəxsi motivasiyası çox önəmlidi. Hesab edirəm ki, keçid baş tutsa, klub və Kadi üçün xeyirli olar. Bu, əlavə büdcədi. Bu da Qurban müəllimin əlindədi. İstəsə, arzu etdiyi futbolçuları gətirmək üçün xərcləyə bilər. Hələ bitən bir şey yoxdu. Danışıqlar gedir.

- Veşoviçlə bağlı durum nə yerdədi?
- Bəli, eyni sözləri deyə bilərəm. Danışıqlar davam edir.

- Sirr deyilsə, hansı mövqelərə və neçə futbolçu transferi gündəmdədi?
- Bunlar Qurban müəllimin tam səlahiyyətindədi. Biz şirkət rəhbəri olaraq bu işlərə qarışmırıq. Onun seçdiyi adlara həssas yanaşırıq. Onu dəstəkləyirik.

- Qurban Qurbanova da təklif var. Buna münasibətiniz necədi?
- Qurbanov "Qarabağ"ı, "Qarabağ" da onu buraxan deyil. O klubu, klub onu yaratdı. İnanıram ki, uzun illər işimiz davam edəcək.