Rövşən Hüseynli Alesioya görə “Araz-Naxçıvan”dan ayrıldı
“Araz-Naxçıvan”nın və millinin qolkiperi Rövşən Hüseynli ilə Joze Alesio Da Silva arasında ciddi narazılığın yaşandığını bir neçə gün öncə xəbər vermişdik.
Həmin vaxt məsələ ilə bağlı “Football-plus.az” saytına açıqlama verən klubun vitse-prezidenti Mahmud Sadıqov artıq problemin həll olunduğunu, yığmanın oyunlarından sonra Hüseynlinin klubda məşqlərə başlayacağını bildirmişdi:
“Baş məşqçi ilə qapıçı arasında bir az inciklik var idi ki, bu da hamıya bəllidi. Artıq barışıblar və Rövşən də məşqlərə başlayıb, hazırda millinin düşərgəsindədi. Yığmanın oyunundan sonra klubun məşqlərinə də qoşulacaq. Bəli, problem var idi, bunu gizlətmək düzgün olmaz. Klubdaxili iclas keçirildi. Orda mən, baş məşqçi, idman direktoru, köməkçi məşqçi və Hüseynli iştirak etdi. Ondan sonra problem aradan qalxdı”.
Ancaq yüksək liqanın oktyabrın 15-də keçirilən 3-cü turunda qolkiperin adı “Araz-Naxçıvan”ın protokolunda gözümüzə dəymədi. Bu üzdən bu gün yenidən Mahmud bəylə əlaqə saxladıq. Və məlum oldu ki, qolkiper karyerasını ölkədən kənarda davam etdirəcək:
“Baş məşqçi ilə qapıçı arasında görüş oldu. Sonda bir yerdə işləmək istəmədilər. Rövşən karyerasını Qazaxıstan “Atırau”sunda davam etdirəcək. Onu ikiaylıq icarəyə verdik. Yanvara qədər Qazaxıstan klubunun şərəfini qoruyacaq. Ondan sonrasını zaman göstərəcək”.
RƏŞAD
Digər xəbərlər
