“Çelsi”nin yeni sahiblərinə klubun daxilindəki bölmələrdən birində həyəcanlı vəziyyətlə bağlı gözlənilməz miras qalıb.

“The New York Times”ın araşdırmasından belə məlum olur ki, artıq uzun müddətdi marketinq departamentində çalışmaq adamlara əzab verir. Əməkdaşlardan birinin intiharına məhz belə durumun səbəb olmasıyla bağlı da gümanlar var. Qəzetin əməkdaşı “Çelsi”nin onlarla indiki və sabiq əməkdaşı ilə söhbət edib. Hər şey marketinq bölməsinin rəhbəri Qeri Tvelvetrinin tabeliyində olanlarla özünəməxsus münasibətlərindən xəbər verir. Yazının bəzi hissələri ilə tanış olmağa dəyər.

Əməkdaşlar zəhərli atmosferdən gileylənir
“Özümü yetərincə güclü adam sayıram və “Çelsi”də çalışana qədər psixi sağlamlıq durumu ilə bağlı heç bir naraharlıq hiss etməmişdim. Ancaq klubda işə başlayandan az sonra yuxum ərşə çəkildi, vəziyyətim get-gedə pisləşdi” – qəzetin əməkdaşı ilə danışanlardan biri belə deyib. “Visa”nın sabiq icraçı direktoru olan Tvelvetri kluba gəldiyi 2017-dən bəri qorxu, təhqir və təzyiq üzərində qurulan idarəçilik sistemi yaradıb. Əməkdaşların dediyinə görə, daim bossun onları həmkarları önündə danlayacağı qorxusu ilə yaşayırlar. Bəziləri deyirlər ki, Tvelvetri qəzəb dalğasında onlardan iclası tərk etməyi tələb edib. Çoxları bu üzdən kollektiv tədbirlərə qatılmaqdan çəkinirlər.

Əlbəttə, əməkdaşlar gileyləniblər. Onlar bu vəziyyətlə bağlı klubun digər rəhbərlərinə də məlumat veriblər. “Çelsi”də praktika belədi ki, klubdan gedənlərlə bu addımın səbəbini aydınlaşdırmaq üçün son söhbət edirlər. İşçilərdən birinin dediyinə görə, qovulandan sonra “Çelsi”nin idarə heyətinin o vaxtkı sədri Bryus Baka hər şeyi ətraflı danışıb. Tvelvetri ilə bağlı giley-güzar klubun daha bir yüksək rütbəli top-menecerinə - icraçı direktor Qay Lourensə də çatdırılıb. Ancaq heç nə dəyişməyib. Əməkdaşlardan birinin dediyinə görə, bölmədə çalışan 50-ə yaxın adamdan 10-u məlum səbəbdən klubu tərk edib. Bəziləri də xəstəlik üzündən həftələrlə, aylarla məzuniyyət götürüb. Onlar bunu işdəki təzyiqlə bağlayırlar.

Klub kanalının sabiq rəhbərinin müəmmalı ölümü

Yanvarda iş intihar həddinə çatdı. Buna qədər 10 il klub telekanalına rəhbərlik edən Riçard Biqnell həyatına son qoydu. Bunun kollektivdəki iş atmosferi ilə nə dərəcədə bağlı olduğu məlum deyil, ancaq həmkarları deyirlər ki, telekanal kommunikasiya bölməsindən marketinq bölməsinin tərkibinə keçəndən sonra onun sağlıq durumunda dəyişikliklər başlayıb. Biqnell ilə Tvelvetrinin münasibətləri alınmayıb. Biqnell aqressiv tənqid yolunu tutan marketinq direktorunun idarəçilik üslubuna uyğunlaşmağa çalışıb. Danışılanlara inansaq, belə durum bəzi əməkdaşları göz yaşlarına boğub. İki kiçik uşağın pozitiv atası kimi tanınan Biqnell ötən yay xəstəlik üzündən məzuniyyətə çıxıb. Sentyabrda işinin başına dönüb, ancaq ertəsi gün qəfil qovulub. Yanvarın əvvəlində isə intihar edib. Həmin hadisədən sonra açıqlanan hesabatda deyilir:

Biqnellin ölümünə görə təzyiq, həmçinin onun həmkarlarının və dostlarının artan məyusluğu “Çelsi”ni yazda bölmədəki korporativ mədəniyyəti öyrənmək üçün bir şirkətin xidmətinə üz tutmağa məcbur etdi. Bəzi əməkdaşlar klubun yoxlamanın ölüm və ya konkret şikayət faktı ilə bağlı olduğunu etiraf etməməsindən çox məyusdular. Bundan başqa, əməkdaşlar bu prosesin təmizliyinə də inanmırlar. İş ondadı ki, problemin araşdırılmasına elə şikayətin hədəfi olan rəhbərlər nəzarət edib. Nəticədə yoxlamadan sonra heç bir nəticə hasil olmayıb, Tvelvetrinin iş metodlarında da heç nə dəyişməyib.
Yuxarıda adı çəkilən nəşr yaşananlarla bağlı “Çelsi” rəhbərliyi ilə də əlaqə saxlayıb – klubda vəd ediblər ki, Direktorlar Şurası ittihamların aydınlaşdırılması üçün auditor qrupu tutacaq. Klubun bəyanatında deyilir:



Hələ ki Tvelvetri klubda işləyir. Həmkarlarımızın məsələ ilə bağlı ona ünvanladığı suallara da cavab verməyib.