Mişel Platini bir müddət əvvəl təmiz adının bərpası üçün sonadək mübarizə aparacağını bəyan etmişdi.

UEFA-nın sabiq prezidenti bu yolda vacib addım atıb.
O, FİFA-nın hazırkı rəhbəri Canni İnfantinondan şikayət edib. Bu barədə “The New York Times” məlumat yayıb. ABŞ-da çıxan populyar qəzetin yazdığına görə, fransalı sabiq funksioner FİFA-nın prezidentini vəzifə səlahiyyətlərindən sui-istifadə etməkdə günahlandırıb. Platininin tələbi ilə İnfantino ilə bağlı Paris şəhər prokurorluğunda təhqiqat aparılır. Maraqlıdı ki, şikayət ərizəsi ötən il noyabrın 17-də verilib. Amma bu məsələyə “The New York Times”ın cümə axşamı sayında aydınlıq gətirilib. Qəzetin əməkdaşı Tarik Panyanın bildirdiyinə görə, Platini eyni zamanda FİFA-nın hüquq departamentinin keçmiş direktoru Marko Villiceri və bu məsələ üzrə daha 4 şəxsi də ittiham edib.

Qeyd edək ki, İnfantino FİFA-ya 2016-cı ilin fevralından rəhbərlik edir. Platini isə 2007-16-cı illərdə UEFA-nın prezidenti olub. Fransalı sabiq futbolçu tutduğu vəzifədən FİFA-da korrupsiya ilə bağlı böyük qalmaqalda müəyyən dərəcədə iştirakına görə ayrılmalı olmuşdu. Əvvəlcə onun futbolla bağlı fəaliyyətinə 6 il müddətinə qadağa qoyulsa da, apellyasiya nəticəsində müddət 4 ilə endirilmişdi.