“Həyat bir gündü, o da bu gündü” (Ramil Sədalının məşhur ifasından)

Ötən il avqustun 19-da “Qarabağ” Bakıda “Aberdin”i qəbul edirdi. Qonaq komandanı Şotlandiyaya əliboş yola saldıq. Bizi sevindirən qola Xayme Romero 30-cu dəqiqədə imza atdı. “Qarabağ”ın qol buraxmadan qələbə qazanması bizi tur üçün xeyli ümidləndirdi. Cavab görüşü bir həftədən sonra rəqibin meydanında keçirildi. Bu dəfə nəticə daha sevindirici oldu. Toral Bayramovun hesabı açdığı oyunda “köhlən atlar” 3:1 hesablı qələbəyə sevindi. Sevincimiz yerə-göyə sığardımı? Əlbəttə, sığmazdı. İki görüşdə “Aberdin”i məğlub edən “Qarabağ” Konfrans Liqasının qrup mərhələsinə vəsiqə qazandı. Bununla da daha bir mövsüm Azərbaycan təmsilçisi avrokubokların qrup mərhələsində iştirak etdi.

Bu iki qarşılaşmanı heç də təsadüfən xatırlayıb, sizin də yaddaşınızı təzələmirəm. Məsələ ondadı ki, hər iki görüşdə “Aberdin”in heyətində “Qarabağ”a qarşı Kalvin Ramzi adlı futbolçu meydana çıxmışdı. Həmin vaxt onun cəmi 18 yaşı var idi. “Aberdin”in futbol akademiyasının yetirməsi olan Ramzi müdafiəçidi kimi komandasını “Qarabağ”ın hücumlarından qorumağa çalışsa da, nə Bakıda, nə də doğma meydanda “köhlən atlar”ın hücumçularını dayandırmaq mümkün oldu. Bir məqamı da qeyd edim ki, Ramzi “Aberdin”in əsas heyətində elə ötən ilin martında debüt edib. “Qarabağ”la oyun da daxil olmaqla, ötən il meydana çıxdığı matçlarda təcrübə qazanmağa, futbolçu kimi yetişməyə çalışıb. Hadisələrin sonrakı axarı göstərir ki, Ramzi bunu bacarıb. Özü də yüksək səviyyədə.

İndi həmin Ramzi, bilirsiz, hardadı? Bəli, Mersisaydda! Bu barədə məşhur “Sky Sports” nəşri yazıb. Gələn ayın sonunda 19 yaşını tamamlayacaq müdafiəçi “Liverpul”un maraq dairəsinə düşüb və Yürgen Kloppun çalışdırdığı məşhur komanda onu müqavilə bağlamaq üçün dəvət edib. Gənc futbolçu əvvəlcə tibbi baxışdan keçəcək, daha sonra isə onunla rəsmi müqaviləyə qol çəkəcək. Mövsüm ərzində “Aberdin”in heyətində 39 oyuna çıxmağı bacaran Kalvin “Liverpul”un skautlarının diqqətini cəlb edib, Kloppun da transfer üçün razılığını almağa nail olubsa, onda böyük istedadın olduğu heç şübhə doğurmur. Artıq “Liverpul”la “Aberdin” öz aralarında razılığa da gəliblər. Şotlandiya klubu akademiyasının yetirməsinin transferindən yaxşı pul da qazanacaq. İngiltərə mətbuatı yazır ki, şəxsən Klopp onda böyük potensial olduğunu vurğulayıb və transferin reallaşmasını rəhbərlikdən tələb edib. “Aberdin” əvvəlcə futbolçu üçün 10 milyon funt sterlinq tələb edib. Bu məbləğin yarısı ilkin mərhələdə ödənməli, qalanı isə hissə-hissə “Aberdin”in hesabına köçürülməliymiş. Sonradan tərəflər ortaq məxrəcə gəlib. Ramzinin transferi üçün “Liverpul” 6,5 milyon xərc çəkəcək. 4 milyon funt sterlinqi “Aberdin” dərhal alacaq. Qalan 2,5 milyonu növbəti mərhələdə almaq mümkün olacaq.

Əməlli-başlı fantastikadı. Adam 7-8 ay əvvəl “Qarabağ”a qarşı oynayırdı, özü də hər iki görüşdə meydanı başıaşağı tərk edirdi. İndi dünyanın top-klublarından biri, Çempionlar Liqasının finalçısı onu heyətinə qatmaq üçün milyonlarla xərc çəkir. Bizim Araz Abdullayev Şotlandiyanın gənclər yığmasına qarşı oyunda adından söz etdirib, “Everton”un maraq dairəsinə düşəndə Kalvin Ramzinin 4-5 yaşı olardı, ya olmazdı. İndi Araz hardadı? Bəli, hardasa istirahət edir. Sonra da “Sumqayıt”ın düşərgəsinə gedəcək, məşq edəcək, Azərbaycan premyer-liqasında bir az gününü keçirəcək. Vəssalam. Azərbaycan futbolunun daha bir ulduzu, gələcəyinə böyük ümidlər bəsləyə-bəsləyə qocaldığımız Araz da belə “sönəcək”. Biz də oturub yeni bir Arazın yetişməsini, üzümüzü ağartmasını gözləyəcəyik. Yəqin xəbəriniz oldu, ötən il Türkiyəyə yola salıb, arxasınca su atdığımız Namik Ələskərov da Azərbaycana qayıtdı. “Bursaspor”dan daha yaxşı komandaya gedəcəyini, heç olmasa, Türkiyənin aşağı liqasında möhkəmlənəcəyini düşündüyümüz Namik “Sabah”la müqavilə bağlayıb. Yeni mövsümdən onu da Azərbaycan çempionatında “daha yaxından” izləmək fürsətimiz olacaq. Aşağı-yuxarı bütün futbolçularımız eynidi. Onların həvəsləri də, mübarizə əzmi də, istedadlarının verdiyi imkanlar da müəyyən həddə qədərdi. Onlar üçün həyat bizim premyer-liqa klublarıyla müqavilə bağlamaqdan, burda gün keçirməkdən ibarətdi. Çox təəssüf...

AMAL