"Qəbələ" heç cür "qara zolaq"dan çıxa bilmir.

Elmar Baxşıyevin komandası Misli premyer-liqasının 17-ci turundan sonra turnir cədvəlinin axarında qərarlaşıb. “Qırmızı-qaralar” ölkə kubokunun 1/8 finalında “İmişli”ni də çətinliklə yendi. Bəs komandanın indiki durumunun əsas səbəbləri nədi? Aparıcı oyunçulardan İlkin Qırtımovla bu məsələlər ətrafında söhbətləşdik.

- Uğursuz nəticələr bir yana, komanda son oyunlarda həm də qırmızı vərəqələrlə yadda qalır. 16-cı turda Emil Səfərov, 17-ci turda Samuel Tetteh meydandan qovuldu. Düşərgədəki gərginliyin səbəbi nədi? 
- Hamısı komandamızın axırıncı yerdə olmasına görədi. Oyun alınmırsa, xoşagəlməz halların yaşanması normaldı. Amma hər vəziyyətdə səbirli olmalı, kollektivi düşünməliyik.

- Bu heyətlə - istər yerli, istərsə də əcnəbi oyunçular olsun - "Qəbələ"nin elitada yerini qoruması çətin olmayacaqmı?
- Əlbəttə, çətindi... İnşallah, dəyişikliklər olacaq. Ən əsası özümüz də dəyişməliyik.

- Ümumi fikir belədi ki, komandaya yeni qoşulan əcnəbi futbolçular, yayda gedənlərin yerini vermədi...
- Bu barədə nəsə deyə bilmərəm. Heç kimin haqqına girmək istəmirəm. Hər kəs komandaya kömək etməyə çalışır, lakin hələ ki alınmır.

- Azarkeşlər də artıq "Qəbələ"dən üz döndərib. Məsələn, “Kəpəz”lə ev oyununuzda cəmi 250 azarkeş var idi. Onlara ünvanlanası hansısa mesajınız varmı?
- Tərəfdarları anlayıram. Onlarla söhbət etmişik. Hardasa bizi başa düşdülər. Sözün açığı, bizim azarkeşlər bəzi klublara baxanda daha anlayışlıdı. Biz də istəmirik ki, onlar stadionu başıaşağı tərk etsin.

- Rəhbərliyin qayğısını necə dəyərləndirirsiz?  Komandanın uğursuz dönəmində onların edəcəyi nəsə var?
- Hər biri bacardığını edir. Güclənmək üçün qışda yenə əldən gələni əsirgəməyəcəklər.

- "Qəbələ"nin əvəzedici heyəti daha yaxşı çıxış edir, liderlər qrupunda qərarlaşıb. Bəlkə əvəzedicilərdən əsas komandaya kimsə gəlsin?
- Bəli, orda çox yaxşı futbolçular var. Məşqçimiz fərqlənən oyunçuları əsas komandaya dəvət edir, oyunçular da özlərini yaxşı tərəfdən göstərir. Belə getsə, oların meydana çıxmaq şansı daha çox olacaq.

- Karyeranıza "Qəbələ"də davam etməyi düşünürsüz? Yoxsa yayda ayrılacaqsız?
- Buna cavab verə bilmərəm. Futbolda hər şey ola bilər. İndi bu vəziyyətdən çıxmağın yollarını axtarırıq.

- "Səbail"lə oyunda avtoqol müəllidi olduz. Öz qapısına üç qol vuran doqquzuncu futbolçu kimi ölkə futbolunun tarixinə düşdüz.
- Heç kim belə şey yaşamaq istəməz. Komandama kömək etmək istəyirəm. Avtoqol hamıdan çox mənə pis təsir edir. Lakin futbolda belə şeylər olur. Tək mənim başıma gələn hadisə deyil.

GÜNAY SÜLEYMANOVA