Futbol veteranı, hazırda yığmanın seleksiyaçısı kimi çalışan İlqar Qurbanovla bəzi aktual məsələlər ətrafında söhbətləşdik.

Ona ölkə çempionatında indiki durum, birvaxtlar formasını geydiyi “Qəbələ”, eləcə də “Qarabağ”ın Avropa Liqasındakı çıxışı ilə bağlı suallar ünvanladıq.

- “Qəbələ”nin cari mövsümdəki uğursuz çıxışının səbəbini nədə görürsüz? 
- Əlbəttə, xoşagəlməz durumdu. Çempionatda aşağı pillələrdə olması heç də ürəkaçan deyil. Azərbaycan futbolu üçün acınacaqlı vəziyyətdi. Çünki çox gözəl klubdu. Özüm də iki il o klubun formasını geymişəm. Həm akademiyası yaxşı idi, həm də infrastrukturu düzgün qurulmuşdu. Oyun planında, taktiki gedişlərdə bir dəyişiklik görmürəm. Elmar Baxşıyevin sabit oynatdığı komanda görürəm. Çox güman, gələnlərin klubu tərk edənlərin səviyyəsində olmaması zəif çıxışın əsas səbəbidi. 
- Elmar Baxşıyev istefaya göndərilməlidi?
- Elmar Baxşıyevin istefaya getməsinə ehtiyac görmürəm. Çünki yaxşı işlər görüb, həm də yaxşı futbol oynadır. Onun köməkçiləri Rasim Ramaldanov, Xəqani Məmmədov və digər məşqçilər yaxşı insanlardı, klub üçün çalışırlar. Ümid edirəm ki, bu qara zolaqdan çıxarlar.
- “Qəbələ” bu duruma düşdüyünə görə rəhbərliyi günahlandırırsız? 
- Çox ideal rəhbərliyi olduğunu deyə bilərəm. Futbolçularına heç bir problem yaratmırlar. Hər futbolçusunun arxasında dururlar. Düşünürəm ki, bir futbolçunun oynamaq istəyəcəyi ideal klubdu. Hazırda maliyyə problemləri olduğunu eşidirik, təəssüf ki, bu hər şeyə toxunur. 
- Vaxtilə formasını geydiyiniz “Qarabağ”ın çıxışı haqda nə deyə bilərsiz? 
- “Qarabağ” həm çempionatda, həm də Avropa Liqasında uğurlu çıxışını davam etdirir. Bunun əsas səbəbi kimi rəhbərliklə məşqçi heyəti arasındakı qarşılıqlı əlaqəni göstərə bilərəm.
- Komanda Avropa Liqasından qrup ikincisi kimi çıxa biləcək? 
- Təbii ki.
- “Qarabağ”ın hər il sabit uğurlu çıxış etməsinin səbəbi nədi?
- Klub rəhbərliyinin futbolçularla münasibəti, hörmət, dürüstlük, rəhbər şəxslərin sadəliyi, uğurlu baş məşqçi seçimi, baş məşqçinin xarakterinin önəmi, düzgün transfer siyasəti və bir çox səbəblər. Kəsəsi, deyə bilərəm ki, klubda hər kəs öz üzərinə düşən vəzifəni layiqincə yerinə yetirir, komanda səbrlə, əzmlə, addım-addım irəliləyir.