“Ən azı qış fasiləsinə qədər olan dönəmdə “Qəbələ”nin durumu heç də ürəkaçan deyil. Bunun səbəblərindən biri kimi ölkə kubokunu qazanandan sonra heyətdəki “açar” oyunçuların satılması və ya tərk etməsi oldu. Bunlar İsnik Alimi, Rafael Utziq, Ramon Maçado və Ruan Renato idi. Belə deyim də: həm yarımmüdafiə, həm müdafiə, həm də hücum mövqelərinə baxanda görə bilərik ki, bu oyunçular komandanın onurğa sütunu idi. Elə Aliminin meydanın mərkəzindən oyunun istiqamətini istədiyi yerə yönəltməsi, Utziqin ən çətin oyunlarda kreativlik hesabına qollar vurması komandanın qələbə qazanmasında önəmli idi. Ruan Renaton indi “Zirə”nin mərkəz müdafiəçisidi, həqiqətən də çətin oyunlarda qapısının toxunulmaz saxlanılmasında böyük rol oynayır. Məncə, bu futbolçuların gedişi istər-istəməz böyük təsir edir. Düşünürəm ki, “Qəbələ”nin indi bu vəziyyətdə olması belə “açar” oyunçuların birdən-birə komandanı tərk etməsi ilə bağlıdı”.

“Hadisələrin axarı belə davam edərsə, əlbəttə, “Qəbələ” premyer-liqadan düşə bilər. Amma hələ ki heç nə itirilməyib. Hesab edirəm ki, qış fasiləsi komanda üçün bir dönüş nöqtəsi ola bilər. Burda bəzi məqamlar var ki, onları dəyişə bilsələr, premyer-liqadan düşməmək yolunda onlara kömək edə bilər. Çünki istər-istəməz ən yaxın izləyicinə - “Kəpəz”ə də məğlub olursansa, düşmək ehtimalın artır. Hesab edirəm ki, belə vəziyyət istənilən komandanın başına gələ bilir. Bəzən Avropada da belə klublar oyunçularını satmağa məcbur olurlar. Səbəblər müxtəlifdi – iqtisadi də ola bilər, oyunçuların oynamaq istəməməsi də. Ancaq bizim komandalarla Avropa təmsilçiləri arasındakı fərq ondan ibarətdi ki, bizdə futbolçunu satıb pul qazanmaq, yenidən oyunçu almaq bir qədər çətindi. Hesab edirəm ki, “Qəbələ”də də bununla üzləşdilər. Əsas oyunçularını satıb, onların yerini doldura bilmədilər. Belə durumlarda klubun büdcəsi ilə bağlı əməlli-başlı iş görmək lazım gəlir. Qış fasiləsinə qədər belə davam etsə, hansısa yeni oyunçu almaq məcburiyyətində qalacaqlar. Bu dəqiqə “Qəbələ”nin oyununa baxası olsaq, düşünmürəm ki, komandanın ümumi oyun üslubu pisdi. Hətta “Qarabağ”a qarşı belə bəzən dominant oyun oynayırlar. Digər komandalarla da başa-baş oynayırlar, sadəcə, məğlub duruma düşürlər. Bunun da səbəblərindən biri müdafiədə “açar” oyunçularının olmamasıdı. İndiki mərkəz müdafiəçiləri ilə tez-tez qollar buraxırlar. Bəlkə qapıçı mövqeyi də ideal deyil. Ondan əlavə meydanın mərkəzində oyun qurucusu görünmür. Emil Səfərov çox yaxşı oyunçudur. “Qara at” kimi hər tərəfə işləyir, texnikası var, amma indiki dövr üçün daha bir təcrübəli futbolçuya ehtiyac var. Emil Səfərov, demək olar ki, komandanın yarısıdı, ancaq o, təcrübə baxımından İsnik Alimi deyil. Sosial mediada Emilin də komandadan gedəcəyi yazılır. O da gedəsi olsa, “Qəbələ”nin işi, ümumiyyətlə, həddən artıq çətinə düşəcək. Yəni onu nəzərdə tuturam ki, belə durumlara bütün komandalar düşə bilər. “Neftçi” də, elə “Qarabağ” özü də belə duruma düşüb. Mövsümə başlayanda baxırsan ki, satdığın oyunçularla aldığın oyunçuların keyfiyyəti uyğun gəlmir. Amma “Qarabağ”ın və ya “Neftçi”nin imkanları əl verir ki, tez zamanda yenidən başqa oyunçu alsınlar. “Qəbələ”də gördüyüm qədəri ilə bu baxımdan imkan məhduddu”.

“Düşünürəm ki, istefa verməli deyil. Bu, Elmar Baxşıyevin buraxdığı səhv deyil. Deyəsən ki, idarəetməni bacarmır, məşqi pis keçir, oyunçuları oynada bilmir, komandada hərc-mərclik var, yəni belə şeyləri nəzərə alsaq, görərik ki, bu tərəfdən “Qəbələ” axsamır. Sadəcə, komanda xal toplaya bilmir. Çünki yetərincə keyfiyyətli oyunçulara malik deyillər. Amma oyun üslubları yaxşı səviyyədədi. Ona görə də Elmar Baxşıyevi dəyişməklə nələrisə dəyişə bilməyəcəklər. Bu mənim fikrimdi. Düzdü, çıxış yollarından biri komandaya “yeni qan”, yeni ad gətirməkdi. Bəzən görürsən ki, hansısa bir məşqçi dəyişikliyindən sonra komanda bir-iki oyunda qələbə qazanır. Amma bu uzunmüddətli bir şey deyil. Yenə də yeni gələn bir məşqçi yeni oyunçular almalıdı, yeni oyunçular gətirməlidi. Eyni şeyi Elmar Baxşıyev üçün edəsi olsalar, məncə, qara zolaqdan çıxa bilərlər. Hələ ki qabaqda uzun marafon var. Mənə elə gəlir ki, qış “transfer pəncərəsi”ndə seleksiyada bir balaca hərəkətli olsalar, bayaq dediyim kimi, əsas mərkəz müdafiəçisi və hücumların davamlılığını artırmaq üçün dayaq yarımmüdafiəçisi ala bilsələr, axırıncı pillədən qurtula biləcəklər”.