Misli premyer-liqasının 18-ci turunda "Qarabağ" "Zirə"ni məğlub edib - 1:0.

"Football-plus.az" xəbər verir ki, matçdan sonra ağdamlıların çalışdırıcısı Qurban Qurbanovun mətbuat konfransı keçirilib. Sizi onun fikirləri ilə tanış edirik:

- İki fərqli hissə izlədik. İkinci hissədə futbolçular artıq istirahət ab-havasında idi?
- Tempi qoruyub-saxlamaq heç də asan deyil. Rəşad Sadıqov bu oyuna çox yaxşı hazırlaşmışdı. "Zirə" çəkinmədi, müdafiədə oturmadı. Bizim üçün heç də asan olmadı. İkinci hissənin sonlarına yaxın "Zirə" üstünlüyü ələ aldı.

- Yanvarın 5-dək vaxtınız var. Bu müddətdə istirahət edəcəksiniz, yoxsa yeni futbolçuları nəzərdən keçirəcəksiniz?
- İstirahət üçün vaxtım az olacaq. 2-3 gündən sonra iş başında olacam. Çünki yanvardan sonra proqramımız daha sıx olacaq. Yaxşı plan üzrə ikinci yarıya hazır olmalıyıq. İşimiz çoxdu.

- Hazırlıq Bakıda olacaq. Bunun sizin üçün mənfi nəticələri olmayacaq?
- İnşallah ki, olmaz. Çünki vaxtımız azıdı. Xaricə gedib vaxt itirmək istəmirdik. Məncə, problem olmayacaq. Komanda uzun müddət istirahətdə olmayacaq. Vaxtımız çox olanda ölkə xaricinə gedirdik. Çempionatın əvvəlindən formamızı daha da yaxşılaşdırmağa çalışacağıq.

- 2023-cü ili necə dəyərləndirirsiniz? Bu il sizin üçün ən yadda qalan an hansı idi?
- Uğurlu il keçdi. Məqsədimiz çempionatda uğurlu çıxış etmək idi. Şükürlər olsun ki, premyer-liqada çempion olduq. Çempionlar Liqasının qrupuna düşməsək də, Avropa Liqasında yaxşı mövsüm keçirdik. Çətinliklər oldu. Gözləntilər çox idi. Digər klublarımız məğlub oldu, ona görə bütün diqqətlər bizim üzərimizdə idi. Amma futbolçularım yaxşı çıxış etdilər. Ölkə kubokunda mübarizəmizə davam edirik. Xankəndidə olmaq, orda oyun keçirmək ilə damğa vurdu. Əziyyət çəkdik, sonda da gedib orda da oyun keçirdik. İnşallah, bundan sonra ölkəmizdə sakitlik olar və düşmən bizə heç bir təsir göstərə bilməz.

- İllərdi ən yaxşı məşqçi seçilirsiniz, amma futbolçularınız bu ada layiq görülmür. Bu il eyni hadisə olsa, buna reaksiyanız necə olar və namizəd olaraq kimi görürsünüz?
- Futbol elə oyundu ki, burda fərqli seçimlərin olmağı normaldı. Futbolçularım tapşırıqlarımı yerinə yetirsinlər, onda mənim gözümdə ən güclüdülər. Namizəd olaraq isə bu barədə düşünmək lazımdı.

- Bədavi bu gün 90 dəqiqə oynadı. O, əvvəlki formasına düşüb?
- Yaxşıya doğru gedir. Bəzən olurdu ki, oyunun gedişində dəyişirdik. Hazırda onun üçün çempionatın davam etməsi daha yaxşı olardı.

- İstirahət müddətində "Braqa"nı izləyəcəksiniz?
- Mütləq.

- İştirakınızla keçirilən son üç mətbuat konfransı uzun çəkir. Sizcə, bunun səbəbləri nədi?
- Yəqin məni çox istəməyə başlamısınız (gülür). Yəqin son oyunlardı deyə. Xankəndidəki suallar çox olmalı idi. Bu gün istəyirsiniz uzun olsun, davam edə bilərik.

- "Hekken"lə oyunda qeyd etmişdiniz ki, azərbaycanlılardan incimirəm. Suallar bəzən tənqidi olsa da, əsəbləşsəm də sonradan keçir. İstərdim bu il hansı təndiqlər sizə təsir etmişdi?
- Ciddi təsir edən hansısa təndiq olmayıb. Yayda "Rakov"a məğlub olduqdan sonra tənqidlər oldu, transfer etmədiyimizlə bağlı fikirlər səslənirdi. Bir neçə oyunçunu satmağımızla bağlı müzakirə gedirdi. Bəzən kənardan baxanda fikir bildirmək asandı. Amma işin içində nələr olur onları bilmədən nəsə deyəndə fərqli olur. İstəmirəm komanda daxilində olan hadisələr kənara çıxsın. Daha böyük klub olmaq üçün risklərə getməliyik. Transfer bazarına girməliyik. Oyunçularımız ölkə xaricinə çıxmalıdı. Bazarda da aktiv olmalıyıq. Digər tərəfdən yerli çempionatda uğursuzluq oldu. Amma bunlar hər il olan şeydi. Buna hazır olmalıyıq. Hər bir azərbaycanlı mənim üçün dəyərlidi.

- Danışıq apardığınız futbolçu var?
- Danışıq apardığımız futbolçular var. Nə dərəcədə uğurlu olacaq onu bilmirəm.

- "Qarabağ"ın futbolçuları ilə maraqlanan komandalar var?
- Maraqlanan komandalar var, amma ciddi təklif yoxdu. Çalışırıq ki, bu məsələləri ikitərəfli yoluna qoyaq.

- "Qarabağ"da əcnəbi futbolçular çoxdu. Xandəndidəki oyunlar bağlı xarici mediadan kimsə futbolçulardan açıqlama almadı. Bizim xeyrimizə olamayan vəziyyət olanda çalışırlar ki, futbolçulardan müsahibə alsınlar. Bunun səbəbini nədə görürsünüz?
- Müəllimim həmişə mənə deyir ki, köməyim sənə mane olmamaqdı. İndi də digərlərinin köməyi bizə mane olmamaqdı. Fransada Xankəndi haqda yazmasalar da hər şey öz qaydasındadı. Futbolçularımızın hadisə barədə tam məlumatı var, nə vaxt sual versələr yerində cavab verəcəklər.