Bir ay əvvəl “Qarabağ”ın baş məşqçisi Qurban Qurbanov cinah müdafiəçiləri Abbas Hüseynovla Elvin Cəfərquliyevi əsas komandadan qovdu. Təbii ki, azərbaycanlı futbolçu kimi brendə çevrilən, “Futbol+”in ümummilli sorğusunda 2025-in ən yaxşı futbolçusu seçilən Elvinin durumu daha ciddi narahatlıq dourur. Səbəb də çoxdu. Cəfərquliyev həm yaşının azlığına, həm potensialına, həm də faydalı iş əmsalına görə Abbası üstələyir.
Bəs Elvinin taleyi necə olacaq? Tərəflər, yəni “Qarabağ” və Cəfərquliyev hansı qərarı verməlidi? Bu mövzu ətrafında təcrübəli futbol adamı Vaqif Sadıqovla söhbətləşdik.
- Vaqif müəllim, sizcə, Elvin bundan sonra hansı qərarı verməlidi? “Qarabağ”ın, daha doğrusu, Qurban Qurbanovun onu bağışlaması ehtimalı var?
- Məncə, vəziyətin nə yerdə olduğunu bilmək lazımdı. Elvini bu yerə çatdıran, ona həmişə dayaq verən “Qarabağ” olub. Tək ölkə daxilində yox. Onun Avropada maraq dairəsinə düşməsi də “Qarabağ”ın Elvinə göstərdiyi qayğıdan irəli gəlir. Çoxumuz Elvini xaricdə oynamasını, bizi sevindirməsini istəyirdik. Ölkə daxilində göstərdiyi performansı, uğurları “Qarabağ”da qazanıb. Elvinlə olan mübahisəli vəziyətin necə olduğunu bilmirəm. Onu itirməmək şərti ilə “Qarabağ” rəhbərliyi, Qurban Qurbanov elə qərar verməlidi ki, Azərbaycana töhfə versin. Elvin özünə bəraət qazanmaq, karyerasını qorumaq üçün yenidən “Qarabağ”da yenidən tər tökməlidi. Ondan sonra təkliflər haqda düşünmək olar.
- Elvinin yenidən “Qarabağ”da oynamalı olduğunu dediz. Amma Qurban Qurbanovun qətiyyətini Elvin də daxil olmaqla hamımız bilirik. Futbolçu da, Qurban Qurbanov da onun bir neçə dəfə bağışlandığını deyib. Bir sözlə, Elvin Qurban bəyin səbr kasasını daşdırıb. Sizcə, Elvin üzr istəməlidimi? Üzr istəsə, Qurbanov onu bağışlayar?
- Əslində cavab sualın içindədi. Qurban Qurbanov Elvini bir neçə dəfə bağışlayıbsa, hər olan hadisədə futbolçudan addım gözləmək lazımdı. Baş məşqçi çalışıb ki, oynasın, amma hər şeyin həddi var. “Qarabağı”n ağırlığını Qurban Qurbanov həmişə vurğulayıb. İstəməzdim ki, şahmat dili ilə desəm, pat vəziyyəti - çıxış yolu olmasın. Elə yol tapılmalıdı ki, Elvinin futbolçu fəaliyyəti davam etsin.
- Amma Elvinin gələn mövsümün sonuna qədər “köhlən atlar”la müqaviləsi var. Yəni onun ayrılması üçün “Qarabağ”a müəyyən məbləğ ödənilməlidi. Ağdam klubunun istədiyi puldan bir az da az maliyyə təklifi gəlsə, “Qarabağ”ın güzəştə gedib, onu satacağını düşünmək olar?
- “Qarabağ” xeyli güc sərf edib Elvini bu səviyyəyyə çatdırmaq üçün. Bir klub onu götürsə, pul verməlidi. Məbləğ az ola da bilməz. Elvin Avropa səviyyəli futbolçular sırasındadı. Təzminatdan əlavə elə qərar verilməlidi ki, “Qarabağ” da, futbolçu da, Azərbaycan futbolu da bəhrə görə bilsin, Elvin futbolda qalsın.
- Elvin əsas komandadan qovulmuş bir futbolçudu. Bu amil onun qiymətinə ziyan vuracaq?
- Bəli. Futbolçunun təkcə meydanda yox, həm də meydandan kənardakı davranışına baxmaq lazımdı. Hər transfer komandanın ab-havasını daşıyır. İntizamsızlıq varsa, bəzi klublar xeyli götür-qoy edib, qərar verir. Qurbanov onu bağışlayanda Elvin papağını qabağına qoyub düşünməliydi ki, sonu belə ola bilər. Hamımız anlayırıq ki, səhv addımlar atıb. Hər kəsin böyüklüyü ondadı ki, başa düşüb, karyerasına son qoymamaq şərti ilə düzgün qərar verilsin. Biz də futbolçu olanda səhv etmişik. Böyüklər düz yol göstəriblər.
MÜZƏFFƏR QULUZADƏ