"Qəbələ" - "Sumqayıt" oyununda meydan sahiblərinin heyətində özünü yaxşı tərəfdən göstərənlərdən biri də Urfan Abbasov idi.

Bunu nəzərə alıb qarşılaşmadan sonra “Football-plus.az” saytı olaraq "qırmızı-qaralar"ın vitse-kapitanıyla ayaqüstü söhbətləşdik.

- "Sumqayıt"la çətin oyun keçirdiz. Amma sondə sevinən tərəf olduz. Təəssüratın maraqlıdı…
- "Sumqayıt"la ağır oyun keçirəcəyimizi əvvəlcədən bilirdik. Rəqib hər qarşılaşmaya sonuncu matçı kimi çıxır. Bizə də xal lazım idi. Qış fasiləsindən bəri qələbəyə həsrət idik. Şükürlər olsun ki, meydanda əlimizdən gələni edib 3 xalı qazandıq. Vacib qələbə idi.

- Qələbəni 4 tur sonra qazandız. Bunun səbəbi nədi?
- İtkilərimiz çox idi. Elə oyun oldu ki, heyətdə stopperlərin heç biri yer almadı. Və ya zədəlilərimiz oldu. Qızdırması olan oyunçularımız da var idi. Qısası, optimal heyətlə meydana çıxa bilmirdik. Buna rəğmən, uşaqlar sona qədər döyüşürdülər. Yalnız son iki oyunda optimal heyətlə çıxış edirik.

- Hazırkı formandan razısan?
- Mövsümün yarısını zədə səbəbindən buraxdım. Hazırda istədiyim formada deyiləm. Amma oyundan-oyuna tam formaya düşəcəyimə inanıram.

- Komandaya bu mövsüm qoşulan Andrey Strijak və qış fasiləsində transfer olunan Əyyub Allaş barədə nə deyə bilərsən?
- Hər biri potensialı yüksək olan, keyfiyyətli futbolçudu. Sadəcə, hələ tam hazır deyillər. Qarşıdakı oyunlarda onların faydasını görəcəyik

- Bəs heyətdəki gənc oyunçular, əsas da Emil Səfərov haqda hansı fikirdəsən?
- İstər Emil Səfərov, istər Hüseyn Mürsəlov, istərsə də digər gənclərin gələcəkdə çox parlaq futbolçular olacağına inanıram. Məşqlərdə çox çalışırlar. Amma üzərlərində hələ çox işləməlidilər. Onların gələcəkləri qabaqdadı.

- Həm kubok, həm də ölkə çempionatda döyüşürsüz. Ən çox hansına fokuslanmısız?
- Açığı, iki “cəbhə”də mübarizə aparmaq çox çətindi. Buna rəğmən, bu bizə həm motivasiya, həm də ümid verir. Çünki hər iki variantdan istifadə etməklə avrokuboka vəsiqə qazanmaq şansımız var. Biz hər iki “cəbhə”yə fokuslanmışıq.

ABDULLA İSMAYILOĞLU