Yoldaşlıq oyunu çərçivəsində keçirilən "Sabah" - "Beşiktaş" oyunundan (3:3) sonra meydan sahibi komandanın baş məşqçisi Murad Musayev jurnalistlərin suallarını cavablandırıb.

"Football-plus.az" xəbər verir ki, mütəxəssis əvvəlcə görüşlə bağlı fikirlərini bildirib:

- Çox yaxşı oyun oldu. Bakıya böyük klub gəlmişdi. Hər iki komanda cəsur, açıq futbol oynadı. Azarkeşlər də oyundan həzz aldı. Ən önəmlisi odu ki, "Sabah" və bura gələnlər Türkiyədəki zəlzələdən əziyyət çəkənlərə dəstək oldu.

- "Beşiktaş"la oyunun Konfrans Liqası öncəsi yaxşı təcrübə olduğunu düşünürsüz?

- Belə hesab etmək olar. 30 min azarkeşin qarşısında oynadıq. Əsas odur ki, futbolçularım Vensan Abubakar və Cenk Tosundan qorxmadı. Qalib də gələ bilərdik. Cəsur oyunumuz xoşuma gəldi.

- Yəqin ki, indi əhval-ruhiyyəniz yaxşıdı. İki saatdan sonra "Qarabağ" çempion olsa, əhval-ruhiyyəniz korlanacaq?

- Xeyr. "Qarabağ" və Qurban Qurbanovu təbrik edəcəm. Onlar buna layiq idilər. Heç nə əhval-ruhiyyəmi korlamaycaq.

- Penaltidən istifadə etsəydiniz, oyun başqa cür gedəcəkdi?

- Məncə, o qədər də dəyişməzdi. Avropada da belə oynamaq istəyirik. "Beşiktaş" cinahları dəyişirdi, qısa ötürmələrlə çıxırdı. Amma qarşısını alırdıq.

- Bu oyun göstərdi ki, "Sabah" avrokuboklara hazırdı. Daha böyük uğurlar üçün nələr etmək lazımdır?

- Çempionatı başa vurandan sonra transferlər haqda düşünəcəyik. Komanda komplektləşəndən sonra nəsə demək olar. Yeni qan lazımdır. Futbolçular Azərbaycana gəlməyi çox da fikirləşmirlər.

- Bu oyundan sonra Aleksey Kaşukun transfer dəyərinin artacağını gözləmək olar?

- Biz onu saxlamaq istəyirik. Amma hər şey bizdən asılı deyil. O, Avropa çempionatına yollanacaq. Necə olacağını görəcəyik.

- Yusif İmanovla avrokuboklara getməyin riskli olduğunu düşünmürsüz?

- Xeyr.

- Bu gün "Qarabağ" çempionluğu rəsmiləşdirsə, komandanı növbəti oyunlara kökləmək çətin olmayacaq?

- Peşəkar olmaq lazımdı. Birinci yerə çata bilmiriksə, qarşıdakı oyunları daha yaxşı oynamalıyıq. Bu emosiyaları, hissləri sevirik. Uşaqlar barədə nəsə söz verə bilmirəm. İnanıram ki, az oynayanlara şans verəcəyik ki, oynasınlar.