"Beşiktaş"da Cenk Tosundan başqa heyətində yüksək səviyyəli hücumçu qalmayan “Beşiktaş” Veqhorstun boşluğunu kimlə dolduracaq?

Türkiyə mətbuatında gəzən şayiələrə inansaq, Vensan Abubakarın 3-cü dəfə komandaya gəlmək şansı yetərincə yüksəkdi. Rəhbərlik ikinci dövrədə Veqhorst üçün nəzərdə tutulan maaşı, yəni təxminən 1,5 milyon avronu Abubakara ödəməyə hazırdı. Təcrübəli kamerunlu forvard artıq “Əl-Nəssr” ilə müqaviləsini ləğv edib və azad agent statusundadı. O, Səudiyyə Ərəbistanında ildə 6 milyon avro qazanırdı. Ona görə də “Beşiktaş”ın illik 2,8-3 milyon avroluq təklifinə necə cavab verəcəyi bilinmir. Hərçənd Avropada, çətin ki, hansısa klub ona “Beşiktaş”dan daha sərfəli təklif irəli sürsün.

Abubakar daha öncə “Beşiktaş”da 2016/17 və 2020/21 mövsümlərində top qovub. 67 rəsmi oyunda 35 qol, 9 məhsuldar ötümə ilə fərqlənən forvard hər iki mövsümdə də çempionluq sevinci yaşayıb.