“Qarabağ” Avropa Liqasında tarix yazmağın astanasından döndü.

Məlum olduğu kimi, bu oyunda qələbə təqdirində yola Avroliqada davam edəcəkdik. Bu üzdən srağagün axşam saatlarında “Bəhramov”un ətrafında əməlli-başlı anşlaq yaşanırdı. Futbolla uzaqdan-yaxından maraqlanan hər kəs tarixi olaya şahidlik etmək istəyirdi.

Hələ oyunun başlamasına 2-3 saat qalmış fanklublar stadionun qarşısına yığışaraq müxtəlif şüarlarla komandanı qələbəyə səsləyirdi. Metronun “Gənclik” stansiyasının çıxışında isə kiçik həcmdə “qara bazar” da fəaliyyətdə idi. Ədalət naminə deyək ki, oyun günü səhər saatlarında Heydər Əliyev Sarayının kassalarında asanlıqla bilet almaq olardı. Qəzetimizin əməkdaşlarından biri 4 biletə 20 manat ödəmişdi.

Metroya yaxın qapıdan daxil olub, media üçün sektora yollanırdım ki, qonaq azarkeşlə diqqətimi cəlb etdi. Əsasən ağ paltar geyən almalar üçün xüsusi yer ayrılmışdı, orda asanlıqla – təbii ki, pulunu ödəməklə! – pivə və enerji içkiləri ala bilirdilər. Rəsmi açıqlamada saylarının 600 olacağı deyilsə də, rəqib azarkeşlərinin sayı 400-dən çox görünmürdü. Bu başqa məsələ ki, yer aldıqları sektorlarda səs-küy aləmi bürümüşdü.

Hakimin start fitinə 15 dəqiqə qalmış “Qarabağ”ın baş meneceri Asif Əsgərovun müşayiəti ilə iqtisadiyyat naziri Mikayıl Cabbarov da stadiona gəldi. Yerli fanatların, eləcə də media üçün ayrılan sektorun üstündə qərarlaşan futbolçu ailələrinin stadionda inanılmaz atmosfer yaratdığını vurğulamasaq, olmaz. Xüsusən də hesab bərabərləşəndən sonrakı dəqiqələrdə gurultu, həyəcan ən üst səviyyədə idi.

“Qarabağ”ın sayılmayan qolundan sonra texniki heyət, eyni zamanda Qurban Qurbanov 4-cü hakimə etirazını bildirdi. Medina meydandan qovulandan sonra Maksim Medvedev mübarizəyə qoşuldu. Bu anda isə Qurban Qurbanov ona sərt şəkildə 4-cü hakimə tez yaxınlaşmalı olduğunu bildirdi.

Oyundan sonra bir müddət stadionu tərk etməyən azarkeşlər futbolçuları alqışladılar. Hakimin final fitindən sonra arenanın ətrafında atəşfəşanlıq oldu. Görünür, klub tarix yazılacağı ümidi ilə ciddi hazırlıq görmüşdü. Tarix yazılmasa da, hər halda, mənzərə pis deyildi, bu da olsun “Qarabağ”ın müharibədəki qələbəmizin ikiilliyinə hədiyyəsi!

Rəqibin futbolçuları qonaq azarkeşlərlə qrup birinciliyini bayram etdi. “Qarabağ”ın futbolçuları da azarkeşlərinin qarşısına getdi. Lakin gözlənilmədən “İmarət”in üzvləri hamılıqla Ramil Şeydayevə “formanı çıxar” deyirdi. Yüngül gərginlik qalan futbolçuların Şeydayevi ordan uzaqlaşdırması ilə sonuclandı.

ŞAİR ABDULLA