Pike yenə yol ayrıcında qalıb - YAZI
Əsas heyətdə olmaq istəyirsə, bir müddət biznes maraqlarını unutmalıdı
İspaniya mətbuatında Jerar Pikenin “Barselona”nın prezidenti Xuan Laporta ilə görüşündən yazırlar – söhbət çox gərgin axarda keçib. Jerar rəhbərliyə məhz elə belə deyib:
“Cəsarətiniz varsa, dünyanın ən yaxşı müdafiəçisini “Barsa”ya gətirin. O əvəzedici olacaq”.
Həmkarımız Xavi Valls “Onze” proqramında detalları əlavə edir: Pike prezidentə istisnasız futbola köklənəcəyini vəd edib. O, qarşıdakı iki ildə, yəni müqavilə müddəti bitənə qədər biznesin idarəçilyindən əl götürəcək. Jerar prezidentə özünü “Barsa”nın əsas müdafiəçisi kimi gördüyünü də deyib.
Maaşı böyükdü – “Barsa” məbləği aşağı salmaq istəyir
Bəli, Jerar “Barsa”ya çox baha başa gəlir. Onun ilk müqaviləsində illik 12 milyon avro yazılmışdı ki, bu da komandada ən yüksək qazanclardan biridi. Ancaq Pike ötən il güzəştə getdi və kluba yeniləri qeydiyyatdan keçirməkdə yardım etdi, böhran dövründə maaşının bir hissəsini təxirə saldı, 5 milyona razılaşdı. Qalan pul ona 2023-ün yayında ödənilməlidi. İnsayder Luis Roxoya inansaq, artıq klubun üzərində 40 milyon avro borc yığılıb. Pikenin 2024-cü ilə qədər olan müqaviləsində loyallığa (7,5 milyon avro) və oyun faizinə (3,3 milyon) görə bonuslar da nəzərdə tutulub – müdafiəçi 2022/23 mövsümündə oyunların 40 faizinə çıxarsa, bu bəndlər aktivləşdiriləcək.
Ancaq yeni reallıqlar fonunda “Barsa” Pikenin belə pullara dəydiyini düşünmür və onu tədricən ehtiyat oyunçular skamyasında oturtmaq fikrindədi. Etibarlı insayder Fernando Polo yazır ki, Xavini təkcə müdafiəçinin zədəyəmeyilli olması çəkindirmir (2021/22 mövsümündə lazaretdə 85 gün keçirib), baş məşqçi həm də belə hesab edir ki, Jerar idman prinsipinə əsasən start heyətinə düşməyəcək. Pike isə əksinə əmindi: əsas heyətdə oynamaq istəyir və rəqabətə hazırdı.
Üstəlik maliyyə ilə bağlı problemlər qalır. Klub hələ ki böhrandan çıxmayıb, bu üzdən Pikedən və Jordi Alba, Serxi Buskets və Serxi Roberto kimi başqa veteranlardan yenidən maaşı kiçiltməyi xahiş edir. Bu yöndə durum mürəkkəbdi, ancaq Jerarın Laporta və Xavi ilə söhbətdən sonra bir qədər yumşalmasına dair xəbərlər də var. “Barsa”nın maliyyə məsələləri üzrə vitse-prezidenti Eduard Romeunun dedikləri də bunu dolayısıyla təsdiqləyir:
“Jerarla çox yaxın münasibətlərim var. Pike həmişə bizlə əməkdaşlıq edib, yenidən belə edəcəyinə əminəm”.
Heyətdə yerin əvəzinə maaş?
Pike bir müddət bizneslə vidalaşmağa söz verib. Bəs söhbət nədən gedir? Jerar futbolçular arasında əsas biznesmendi. Son 12 il ərzində ciddi-cəhdlə imperiya qurub – Katalaniyanın ESADE biznes məktəbində və Harvardda bu işin əsaslarını öyrənib, sonra isə biliklərini praktikada tətbiq edib – “Kosmos” holdinqini yaradıb (holdinq futbol və tennis təşəbbüsləri üzərində ixtisaslaşıb + prodakşn).
Jerar biznes layihələrinin əsasını “Kosmos”u yaratmaqla qoyub. O, bu holdinqin köməyi ilə idman biznesi dünyasını və medianı dəyişmək istəyir. Holdinq üç əsas istiqaməti – futbol, tennis, prodakşn – inkişaf etdirir. İlk böyük layihə Antuan Qrizmannın “Atletiko”da qalmaqla bağlı qərarından bəhs edən sənədli filmdi.
2018-in dekabrında holdinq “Andorra”nı “uddu” – həmin vaxt klub İspaniyanın 5-ci divizionunda çıxış edir və elitaya can atmırdı. Ancaq Pike 4 il ərzində klubu İspaniyanın gücünə görə 2-ci divizionu sayılan sequndaya çıxardı. Baxmayaraq ki, formal cəhətdən klubda heç bir vəzifəsi yoxdu.
“Kosmos Holding”in futbol əməliyyatları üzrə bossu Jerarın “Andorra” layihəsində iştirakını belə anladır:
“O, bütün prosesə nəzarət edir, əlaqələr baxımından yardım göstərir, məsləhətlər verir. Sadə desəm, Pikenin üzərində minimal yük var: “Andorra” onun birbaşa iştirakı olmadan da fəaliyyət göstərir, üstəlik layihənin arxasında Harvard təhsili görmüş ağıllı kişilər dayanır”.
Hələ 2018-in əvvəlində Pike prinsipial cəhətdən yeni işə qol qoydu: onun şirkəti tennis üzrə Devis kubokunun əsas səhmdarına çevrildi. Pike 23 yaşından bu turniri dəyişməyi, futbol üzrə dünya çempionatının oxşarına çevirməyi arzulayırdı. İşin əvvəlində bu arzusunu gizlətmirdi:
“Bu layihə üzərində 24/7 rejimində çalışıram. Bu mənim bütün həyatımın layihəsidi, düşünürəm ki, doğru yoldayıq. Arzu varsa, onun uğrunda döyüşmək lazımdı”.
Və sonuncusu: Pikenin İspaniya Kral Futbol Federasiyasının (RFEF) başçısı Luis Rubiales ilə danışıqlarını xatırlayırsızmı? Onda İspaniya Superkubokunun Səudiyyə Ərəbistanında keçirilməsiylə bağlı danışıqlar Pikenin sahibi olduğu “Kosmos” vasitəsi ilə aparılırdı. Jerar özü turnirin yeni formatını təklif etdi və pul məsələlərini razılaşdırdı. Nəticədə “Kosmos” sövdələşməyə görə 6 milyon avro aldı, hər turnirə görə də 4 milyon götürəcək.
“Barsa” hansı müdafiəçini gətirmək istəyir?
Əsas variant Kalidu Kulibalidi. “Napoli”nin yeni müqavilə ilə bağlı təklifini rədd edən seneqallı başqa klubların təkliflərinə baxır. “Corriere dello Sport”un yaydığı xəbərə görə, “Çelsi” və PSJ də müdafiəçinin xidmətində maraqlıdı. Ancaq kataloniyalıların marağı daha böyükdü. Adı çəkilən nəşr onu da dəqiqləşdirib ki, Kulibaliyə görə minimum 40 milyon avro xərcə düşmək lazım gələcək, bu isə indiki “Barsa” üçün çox yüksək məbləğdi.
Üfüqdə Jül Kundenin də personası görünür. “Mundo Deportivo” müdafiəçinin “Barselona”ya keçmək istədiyini yazır, ancaq daha pullu iddiaçılar – “Çelsi” və “Nyukasl” da var. Kataloniyalılar Jülün qiymətinin 65-70 milyon avro olduğunu bilirlər, ancaq “Sevilya”nı qiyməti aşağı salmaqla bağlı dilə tutacaqlarına ümid edirlər. Serjinyo Destin və ya Fransisk Trinkanın da bu sövdələşmənin bir hissəsi olması mümkündü.
ORXAN
Digər xəbərlər
