“Aqrosport” Gəncə stadionuna yeni qazon salır
Gəncə şəhər stadionunun son durumu hamıya bəllidi. Arenanın qazonu sıradan çıxıdığına görə “Kəpəz” qarşıdakı iki ev oyununu “doğma divarlar”dan kənarda keçirmək məcburiyyətində qalıb. “Sarı-söylər”in elitada qalmaq uğrunda mübarizə apardığı, mövsümün qızğın çağında, hər xalın qızıldan qiymətli olduğu vaxtda Gəncədən perik düşməsi heç yerinə düşmür.
Görəsən, Tərlan Əhmədovun çalışdırdığı kollektiv mövsümün sonuna qədər Gəncəyə dönə biləcək, yoxsa “qaçqın komanda” statusunu daşıyacaq? Gəncədəki etibarlı mənbədən əldə etdiyimiz məlumata görə, qazona qulluq edən “Aqrosport” şirkətinin əməkdaşları ot örtüyünü kürüyərək yenidən, daha dəqiq desək, sıfırdan toxum səpib, yeni qazon salırlar. Şirkətin əməkdaşları 2023/24 “futbol ili”ndə Gəncə stadionunda oyun keçirilməsini istəmir. Ancaq klub rəhbərliyi bunun əleyhinədi. Rəsmilər mayın 21-nə təyin olunan, premyer-liqanın 35-ci turuna təsadüf edəcək “Neftçi” ilə matçın Gəncədə baş tutmasında israrlıdı. Mənbəmiz onu da bildirdi ki, şirkər nümayəndələri həmin vaxta kimi örtüyün qaydasına düşəcəyinə təminat verir, ancaq otun kövrək olması səbəbindən meydanın dağıla biləcəyini də istisna etmir.
"Football-plus.az" olaraq məsələyə aydınlıq gətirmək üçün “Kəpəz”in İdarə Heyətinin sədri İlqar Nadiri ilə əlaqə saxladıq. Onun söylənilənlərə reaksiyası belə oldu:
“Çox istərdik ki, 4-cü dövrənin ev oyunlarını öz meydanımızda keçirək. Təəssüf ki, bəlli səbəbdən Gəncədən kənara çıxmağa məcburuq. O ki qaldı meydana qulluq edən “Aqrosport” şirkətinin qarşısına qoyduğumuz şərtə, klub olaraq gördüyü işin müqabilində adını çəkdiyiniz şirkətə vəsait ödəyirik. Belə olan halda onların qarşısına şərt qoymağımız, nəyisə tələb etməyimiz anlaşılandı”.
Son günlər mətbuatda “Kəpəz”in baş məşqçisi Tərlan Əhmədovun adı yığma ilə yanaşı hallanır. Yayılan xəbərlərə inansaq, AFFA İcraiyyə Komitəsinin bu gün keçiriləcək iclasında Canni de Byazini istefaya göndərəcəyi halda, Tərlan bəy ölkənin əsas komandasının “sükanı arxasına” keçə bilər. “Kəpəz”in İdarə Heyətinin sədri “Football-plus.az"a açıqlamasında bu məsələyə də münasibət bildirdi:
“Xatırlayırsızsa, Şahin Diniyev də “Kəpəz”də çalışandan sonra millinin baş məşqçisi postuna dəvət olundu. Bu dəfə Tərlan Əhmədovun adının yığma ilə yanaşı hallanması bizi yalnız sevindirə bilər. Deməli, Gəncə təkcə futbolçu yox, eyni zamanda milliyə məşqçi də yetişdirir” (gülür).
RƏŞAD
Digər xəbərlər
