İki mövsüm əvvələ qədər “ağ-qaralar”ın formasını geyən, əvəzedici komandaya qədər yüksələn və əsas heyətdə iki oyuna çıxan Rüfət Abbasov evinə - “Neftçi”yə qayıtdı.

Açığı, bu transferi gözləmək olardı. Rüfət bu klubda böyüyüb, “Neftçi”ni sevir. İldə 250 min manat maaş alacaq.

İki mövsüm ərzində Ayxan Abbasovun əlinin altında “bişdi”. “Neftçi”nin Rüfət Abbasova ehtiyacı var idi. Yuri Vernidub yerli gənclərlə işləməyi sevir. Emil Səfərovu bataqlıqdan çıxardı. Rüfəti də formasının zirvəsinə çatdıracağından şübhə yoxdu. Hazırda bu cinahda “Neftçi”də üç futbolçu oynaya bilir – Mustafa Sek, Luis Ortis və Andrey Ştoqrin. Əldə etdiyimiz məlumata görə, Sek komandada qalacaq. Amma Rüfətin rotasiyası üçün. Ştoqrin və Ortis isə universal futbolçulardı. Mövqeləri sol cinah olmasa da, ehtiyac olanda oynayırlar.

Rüfət “Şamaxı”da oynadığı halda, çempionatın ən yaxşı sol cinah müdafiəçilərindəndi. “Futbol+”in bu mövsüm üçün rəmzi heyətində ən çox seçilən futbolçulardan biridi. Rüfətin “Neftçi” üçün uğurlu transfer olacağına ümid edirik.

MÜZƏFFƏR QULUZADƏ