Son günlər haqqında bir çox iddialar dolaşan Jorje Jezuşun nəhayət, Səudiyyə Ərəbistanı macərası başa çatdı.

Daha öncə ''Əl-Hilal''ı çempion edən ünlü portuqaliyalı mütəxəssis son mövsümdə Kriştiano Ronaldolu ''Əl-Nəssr''in 7 illik çempionluq həsrətinə son qoymasına yardım etdi. Çempionluğun rəsmiləşməsinin ardından Jezuş ''indiyə qədər yalnız Türkiyədə çempion ola bilməmişəm, ''Fənərbaxça'' ilə yarımçıq qalan hekayəm var'' açıqlaması ilə diqqət çəkdi.

Bu sözlərdən sonra onun tezliklə ''Fənər''in başına keçəcəyi ilə bağlı fikir formalaşdı. Amma sonradan vəziyyət dəyişdi. Səudiyyə Ərəbistanı mənbələri iddia edirdilər ki, Ronaldonun tələbi ilə ''Əl-Nəssr'' rəhbərliyi Jezuşu daha bir il klubda saxlamaq niyyətindədi.

Göründüyü kimi bu xəbər yalan imiş. Mayın 28-də ''Əl-Nəssr'' Jezuş ilə yolların ayrıldığını rəsmən açıqladı. Klubun vida paylaşımında məşqçi üçün xoş sözlər yazıldı və o, hətta qəhrəman da adlandırıldı. İlk baxışdan artıq Jezuşun ''Fənər''in başına keçməsində heç bir maneə yoxdu. Amma məsələ burasındadı ki, İstanbul nəhəngində prezidentliyə hər iki namizəd - həm Əziz Yıldırım, həm də Hakan Safi indiyə qədər Jezuş ilə görüşmədiklərini açıqlayıblar.

İstənilən halda bu mövzuda iyunun 6-7-də baş tutacaq seçkilərdən sonra yeni xəbərlərin olacağı istisna edilmir.

Xatırladaq ki, 71 yaşlı Jezuş 2022/23-də ''Fənər''i çalışdırıb və bu klubla ölkə kubokunu qazanıb.