''Fənərbaxça''da qarşıdan gələn prezident seçkilərində namizəd olan Əziz Yıldırım klubun sabiq ulduzlarını yenidən bir yerə toplamaq istəyir.

Yıldırım özü də bir neçə dəfə bu ideyanı dilə gətirib. Düzdü, o, əsasən sabiq yerli futbolçuları nəzərdə tutur. Amma maraqlıdı ki, bir əcnəbi ismin də kluba yönətici kimi qayıtması ciddi gündəmdədi. Söhbət Dirk Kuytdan gedir.

Yaxın keçmişin önəmli ulduzlarından olan niderlandlı ''Fənərbaxça''da 2012-15-ci illərdə top qovaraq 130 oyunda aktivinə 37 qol, 28 məhsuldar ötürmə yazıb. ''Fənər''in 2014-də qazandığı sonuncu çempionluqda onun da əməyi az olmayıb. Yağız Sabuncuoğlunun paylaşdığı məlumata görə Əziz Yıldırım seçkilərdə qalib gəlsə, Kuyt ''Fənərbaxça''da transfer komitəsinin başına keçəcək!

Hazırda 45 yaşı olan Kuytun məşqçi karyerası istənilən səviyyədə keçmir. 2024/25-də onun çalışdırdığı ''Beersxot'' Belçikada elitanı tərk edərək aşağı liqaya yuvarlandı. Kuyt 2025-dən bu yana Niderlandın aşağı liqa təmsilçisi ''Dordrext''i çalışdırır. Onun komandası son mövsümü 10-cu pillədə tamamlayıb.

Kuyt seçkilərin nəticələrini gözləyir. Yıldırım qalib gəlsə, o, istefa verərək Türkiyəyə gələcək və bu yay ''Fənər''in həyata keçirəcəyi transferlərdə fəal rol oynayacaq.