“Çelsi”nin yeni sahiblərlə ilk transfer yayı idealdan çox uzaqdı:

“Barselona”, demək olar ki, bütün arzulanan oyunçuları ələ keçirib, yalnız Kulibali ilə Sterlinq gəlib, bir başqa oyunçu qrupu da çıxış qapısının yolunu tutub.

İş yerini dəyişmək istəyənlərdən biri də Timo Vernerdi. İngiltərədə işləri heç də yaxşı getməyən almaniyalı durumu dəyişmək üzərində düşünür. Şayiələrə inansaq, ona iddialılar arasında “Real” və “Yuventus” da var idi. Ancaq indi əsas variant vətənə - “Leyptsiq”ə dönüşlə bağlıdı. Bu variant Vernerin özünün də xoşuna gəlir, hətta sabiq klubuna dönmək naminə əməkhaqqının azaldılmasına razıdı. Forvard hazırda vergilər çıxılmadan ildə 15 milyon avro qazanır ki, bu da “Çelsi”də ən yüksək maaşlardan biridi. Ancaq Verner üçün puldan daha çox DÇ-2022-yə Almaniya yığmasının əsas hücumçusu kimi yollanmaq imkanı vacibdi. Ən əyləncəli məqam odu ki, Vernerin gedişi onsuz da narazı olan Tomas Tuxelin əhval ruhiyyəsini bir qədər korlaya bilər.

Qəribə münasibətlər: Verner xoşbəxt deyil, Tuxel tənqid edir, ancaq buraxmır

Ümumiyyətlə, Tuxellə Vernerin münasibətləri tez-tez dəyişir. Tomas yenicə “Çelsi”yə gələndə həmvətini hər cür dəstəkləyirdi. Ən məşhur tarixçə: məşqçi Timoya qapıya zərbələr üzərində ayrıca işləməyi qadağan etmişdi, ona görə ki, “bədəni və beyni necə qol vurmaq lazım gəldiyini bilir”.

Ancaq qollar yox idi ki, bu üzdən Verner ötən payız ehtiyatda əyləşdi. Tuxel oktyabrda belə deyirdi:

Almaniyalı forvard premyer-liqada keçirdiyi 56 oyunda cəmi 10 qol vurdu. Düzdü, Timo zaman-zaman canlanırdı – ÇL-də “Zenit”lə oyunda dubl etdi, apreldə iki oyunda 3 qol vurdu. Ancaq hücumçu onu da etiraf edirdi ki, öz oyunu və “Çelsi”nin üslubu xoşuna gəlmir. Martdakı müsahibəsində belə demişdi: “Bəlkə də yığmanın üslubu mənə daha uyğundu. Yığmada həmişə qol imkanlarım olur, vura bilirəm. Burda özümü çox rahat hiss edirəm”.
Verner yayda daha bir açıqlama verdi:

“Ən vacib şey xoşbəxt olmaqdı. Mən isə çox oynayanda və qol vuranda xoşbəxt oluram. Harda olsa, xoşbəxt ola bilərəm. Aydındı ki, daha çox oynamaq istəyirəm və oynamalıyam ki, DÇ-yə ideal formada yollanım”.

Bu açıqlama heç də Tuxelin xoşuna gəlmədi:

“Təəccübləndim. Bu gənc oğlanın yerində olsaydım, sadəcə, “Çelsi” ilə müqavilə imzaladığıma görə xoşbəxt olardım. Planetdə ən xoşbəxt adamlardan biri olardım. Timo belə deyibsə, onu anlamıram. Heyətdə yer almağa layiq olduğunu sübut et və o yeri tut”.

Hətta oyundaşları da deyirlər ki, Timo “Çelsi”nin mövsümöncəsi toplanışında can qoymur. Müdafiəçi Malanq Sarr Tuxelə şikayətlənib ki, Verner ötürməyə çatmaq üçün sürəti artırmadı, baş məşqçi isə müdafiəçidən susmağı xahiş edib. Və məhz bu məqamdan sonra “Sky Sports”un alman jurnalisti Florian Plettenberq yazdı ki, baş məşqçi hücumçunun gedişinə mane olmayacaq – onlar arasındakı münasibətlər ciddi şəkildə pozulub.

Verner getsə, iki nominal hücumçu qalır

Düzdü, Tuxeli çəkindirən məqam da var. Timo gedərsə, heyətin dərinliyinə xələl gələcək. Bu yay Lukakunu da buraxıblar, Timo gedərsə, hücumçuların sayı azalacaq. Belədə iki nominal hücumçu qalır.

Armando Broya – ötən mövsümü icarə qaydasında “Sauthempton”da keçirib, premyer-liqada keçirdiyi 32 oyunda 6 qol vurub. Prinsipcə istedadlı gənc (20 yaşı var), turnir cədvəlinin 2-ci hissəsində qərarlaşan komandanın hücumçusu üçün pis statistika deyil.

Mişi Batşuayi – yenicə növbəti icarədən qayıdıb. Bu dəfə “Beşiktaş”da oynayıb, 14 qol vurub. Ancaq 2016-dan “Çelsi”də olan belçikalı bu müddətdə yalnız 2,5 mövsüm Londonda qalıb.

Yəqin ki Tuxelin əsas variantı Kay Havertsi “yalançı 9 nömrə” kimi oynatmaq olacaq. Və ya Rahim Sterlinq də var – Pep Qvardiola bəzən ondan bu rolda yararlanıb. Ancaq Tuxel açıq-aşkar klubun inkişaf etməsini və güclənməsini istəyir. Ən yüksək hədəflər uğrunda mübarizə aparacaq komanda Broya ilə Batşuayinin ümidinə qalmamalıdı. Təcili daha bir səviyyəli hücumçu axtarışı başlamalıdı. Əlbəttə, bazarda bu gün beləsi qalıbsa...