Robert Levandovski ilə “Bavariya”arasındakı vəziyyət getdikcə mürəkkəbləşir.

"Football-plus.az" xəbər verir ki, Polşalı superbombardir son 8 ildə şərəfini qoruduğu Almaniya klubundan ayrılmaq istəyir. Karyerasında növbəti səhifə açmaq arzunda olan 33 yaşlı futbolçunun “Barselona”ya can atdığı da məlumdu. Lakin rəhbərlik kluba müqavilə ilə hələ bir il də bağlı olan Roberti satmaq niyyətindən çox uzaqdı.

Son günlər müxtəlif mənbələrə açıqlamalar verən Levandovski “Bild” qəzetinə müsahibəsində maraqlı məqamlarla bağlı sualları cavablayıb.

- “Bavariya”nı tərk etmək istəyini necə izah edirsən?

- Mən gedirəm, çünki həyatımda daha çox emosiya olmasını istəyirəm. Məni dinləmək istəmədilər. Artıq məndə nəsə sönüb və bunu bərpa etmək mümkün deyil. Bunu hətta peşəkarlığı qorumaqla da kompensasiya etmək qeyri-mümkündü. Dostlarımdan ayrılıram. Onlardan bəziləri ilə uzun illər birgə oynamışıq. Bir-birimizi az qala hər gün görmüşük. Bu əsl dostluqdu. Klubda uzun illər oynamısansa, zədə və ağrılara baxmayaraq, tam gücünlə mübarizə aparmısansa... Fikrimcə, hazırkı vəziyyətdən çıxış yolu tapılmalıdı. Həm də veriləcək qərar birtərəfli olmamalıdı. Sonradan arzuolunmaz vəziyyətə düşəcəyini bilən hansı oyunçu “Bavariya”ya gələr? Bəs loyallıq və hörmət kimi amillər hara yoxa çıxıb? Mən bu klubda 8 möhtəşəm il keçirmişəm, çox yaxşı adamlarla rastlaşmışam və bu halların beynimdə olduğu kimi qalmasını istərdim.

- “Bavariya”da emosiya yetərsizliyindən əziyyət çəkdiyini deməklə nəyi nəzərdə tutursan?

- Ötən həftə bu barədə uzun açıqlama vermişdim. Bu heç də gecikmiş fikir deyil. Mən jurnalistə saatyarımlıq müsahibə vermişdim, həm də bir neçə dəqiqə futboldan danışmışdıq. Amma bəzi məqamlarda fikirlərim təhrif olunub.

- Sənlə klub arasında yeni müqavilə mövzusunda danışıq olmayıb. Bu, sənin üçün ən məyusedici məqamdı?

- Artıq bu haqda danışmaq istəmirəm. Mən son 8 ildə birlikdə qazandığımız uğurlara görə “Bavariya”ya böyük hörmət bəsləyirəm. Bu klub və Münhen mənim evimə çevrilib. Burda özümü uzun illər ərzində xoşbəxt saymışam. Meydanda və ondan kənarda çoxlu əla adamlarla tanış olmuşam. Amma indi karyeramda yeni səhifənin açılmasını istəyirəm. Futbolçu həyatımda mənəvi planda dəyişikliyin olmasını istəyirəm. Bu, mənim fikrimdi.

- Komandadan getmək istəyinin azarkeşlərə necə təsir etdiyini anlayırsan?

- Komandanın və azarkeşlərin mənə bəslədiyi ümidləri doğrultmaq üçün həmişə əlimdən gələni etmişəm. “Bavariya”nın tərəfdarlarına dəyər verirəm. Onlar məni həmişə dəstəkləyiblər. İndiki vəziyyətdə dürüst olmasaydım, fanatlara münasibətdə ədalətsiz mövqe tutduğumu hiss edərdim. İndi onların böyük emosiyaların içində olduğunu bilirəm, amma azarkeşlərin məni nə vaxtsa anlayacaqlarına ümid edirəm.

- Özünü nankor və eqoist hesab edirsən?

- Yox, mən eqoist deyiləm. “Bavariya”da keçdiyim yolun əvvəlindən indiyədək nələrin baş verdiyini yaxşı bilirəm və buna çox böyük dəyər verirəm. Mən onu da bilirəm ki, son 8 ildə klubu və azarkeşləri məyus etməmək üçün bütün imkanlarımdan maksimum yararlanmışam. Bu qədər müddət arxada qalandan sonra indi karyeramda yeni mərhələnin yetişdiyini hiss edirəm.

- Amma kluba müqavilə ilə hələ bir il də bağlısan...

- “Bavariya”ya və onun qaydalarına hörmət edirəm. Lakin uzun müddətdən sonra dəyişiklik etmək klub və oyunçu həyatının bir hissəsi sayılır. Bu fikrimin eqoistlik sayılmayacağına ümid edirəm. Bəli, müqaviləmin müddəti bir ildən sonra başa çatacaq. Amma mən kluba indi nə hiss etdiyimi anlatmağa çalışmışam.

- “Bavariya” artıq sənin üçün arxada qalıb?

- Kluba və ictimaiyyətə müqaviləni yeniləməmək qərarına gəldiyimi bildirmişəm. Odu ki, gəlin, “Bavariya”dakı gələcəyim haqda danışmayaq. Mən bununla spekulyasiyalara son qoymaq istəmişəm.

- Necə düşünürsən, bu yay komandanı tərk edəcəksən?

- Bilmirəm. Müqaviləmin davam etməsinə görə klubdan mənə getməyə razılıq verməsini xahiş etmişəm. Fikrimcə, bu, mövcud vəziyyətdə ən yaxşı qərardı. Üstəlik, klubun məni satmaqla pul qazanmaq imkanı var. Mən başqa komandada daha bir neçə il sürəcək yeni çağırışı qəbul etmək arzusundayam. Bu, mənim istəyimdi. Məsələnin lap əvvəlindən hər iki tərəfi qane edəcək qərarı axtarıb tapmağın faydalı olacağını demişəm. “Bavariya” dünyanın ən böyük klublarından biridi. Bir çox əla oyunçunun arzuladığı klubdu. Rəhbərliyin məni müqaviləmin müddətinin sonuna qədər sıralarında saxlamaqdansa, satışımdan əldə ediləcək vəsaiti sərmayə kimi kluba qoyması “Bavariya”nın xeyrinə olardı. Hadisələri qabaqlamaq istəmirəm, məsələ bununla bağlı deyil. Söhbət ən yaxşı qərarın verilməsindən gedir.

- Amma rəhbərlik “Levandovski müqaviləsini yerinə yetirəcək” fikrini təkrarlamaqdan yorulmur.

- Bu haqda heç nə demək istəmirəm, ona görə ki, bu mövzuda çox danışılır və yazılır. Bəzi fikirlər ya təhrif olunur, ya da çox şişirdilir. Bunun sona çatmasını istəyirəm. Eskalasiya istəmirəm. KİV dünyası və futbol dünyası iki fərqli sahədi. KİV-də və cəmiyyətdə daim şayiə və emosiyalar baş alıb gedir. Real futbol dünyasında isə sakitlik, xüsusilə də transfer əməliyyatları aparılan dövrdə vacibdi. Bax, buna görə odun üstünə yağ tökmək istəmirəm. Emosiyalar soyumalıdı. Mən KİV vasitəsilə yox, sakit danışmaq istəyirəm. Münaqişələrin tez-tez manşetlərə çıxdığını bilirəm. Ancaq mən “Bavariya” ilə düşmən deyiləm. Bu kluba ən xoş arzularımı bildirirəm. Və rəhbərliyin də mənim kimi düşündüyünə şübhə etmirəm. Bax, buna görə əvvəlki kimi razılığa gələcəyimizə əminəm.

RAMİL YUSİFOV