Orelyen Çuameninin tezliklə “Real”a qoşulmaq ehtimalı daha da artıb.

"Football-plus.az" xəbər verir ki, İspaniya nəhəngi onun transferi üçün “Monako” ilə şifahi razılığa gəlib.

“The Athletic” qəzetinin məlumatında Madrid klubunun 22 yaşlı yarımmüdafiəçinin transferinə görə 100 milyon avrodan xərcə düşəcəyi iddia edilir. Halbuki bir neçə gün əvvəl Orelyenin madridlilərə 60 milyon avro təzminat və təxminən 20-25 milyon avro bonus hesabına başa gələcəyi açıqlanmışdı. Deyilənə görə, fransalı oyunçu “Real”da oynamaq naminə PSJ, “Liverpul” və “Mançester Yunayted”dən imtina edib. Çuameni “Monako”nun heyətində 50 oyuna çıxıb və 5 qol vurub.

Yeri gəlmişkən, Luka Modriçlə müqavilə yenilənib. Müqavilənin detalları rəsmən açıqlanmayıb. 36 yaşlı yarımmüdafiəçi komandada 2012-ci ildən çıxış edir. Modriç son mövsüm bütün turnirlərdə 45 oyunda meydana çıxıb, 3 qol vurub və 12 məhsuldar ötürmə edib.