Misli premyer-liqasında 28-ci tura yekun vurulur.

"Football-plus.az" xəbər verir ki, "Şamaxı" "Qarabağ"ı qəbul edib - 0:1. Oyundan sonra ağdamlıların çalışdırıcısı Qurban Qurbanovun mətbuat konfransı keçirilib. Sizi mütəxəssisin fikirləri ilə tanış edirik:

- Heyət seçimi futbolçuların millidən yorğun qayıtması ilə bağlı idi?
- O amil də var idi. Bir neçə oyunçunun daha çox istirahət etməsini istədik. İki ağır oyun keçirmişdilər. Sonda meydanda yerlilərin sayı çoxaldı. Digər futbolçular da əsas heyətdə oynamağa layiq idilər. "Qalatasaray"la matçda hər biri özünü yaxşı tərəfdən göstərmişdi. Qarşıda da belə hallar ola bilər. Kim hazırdısa, onu meydana buraxmağa çalışırıq.

- Millidən qayıdan futbolçularla milli mövzusunda söhbətiniz olub?
- Yox. "Şamaxı" ilə oyuna hazırlaşırdıq. Sadəcə onların yorğunluğuna görə narahat idim. Psixoloji sıxıntıları da hiss olunurdu, bir az həvəssiz idilər. İki gün əvvəl normal məşq keçdilər.

- Filip Ozobiçin oyununda düşüş hiss olunur. Bunun səbəbi nədi?
- Hec bir psixoloji problemi yoxdu, hər şey qaydasındadı. 4 ay oynamadı. Hələ indi özünə gəlir. Bir az oyun praktikası lazımdı. Birdən-birə 90 dəqiqə meydanda olmağa tam hazır deyil. Bizim üçün hər oyun çox vacibdi. Qarşıdakı matçlarda yavaş-yavaş qaydasına düşəcək.

- Millinin məşqçisi Arif Əsədov bildirib ki, futbolçular fiziki cəhətdən hazır deyillər. Bu haqda nə deyə bilərsiz?
- Fikir bildirmək istəmirəm. İllər boyu bu söhbət həmişə var. Əksinə, millidən qayıdandan sonra futbolçuları əvvəlki formasına qaytarmaq üçün mənə azı 20 gün lazım olur. Oynayanlara istirahət verirəm. Oynamayanlar həm məşqlərdən, həm oyun praktikasından uzaq qalırlar. Millidən qayıdandan sonra futbolçuların hamısını eyni səviyyəyə gətirmək bizim üçün heç də asan deyil. Bu söz-söhbətlər həmişə olub. Normal şeydi.

- Qapıda Amin Ramazanova şans verməməyinizin səbəbi nədi?
- Hər futbolçunu meydana buraxmaq düşüncəmiz olur. Bu gün belə qərar verdik. Amin son vaxtlar yaxşıya doğru gedir. Daha da yaxşı olacaq.