“CBC Sport”un “90 dəqiqə” verilişinin qonağı olan Samir Abasov “Neftçi”də çalışdığı dönəmlə bağlı qeyri-adi açıqlamalar verib. Əslində belə danışıq tərzi, seçilən ifadələr çoxunu, eləcə də bizi təəccübləndirmədi. Çünki bu mütəxəssis həm “Sumqayıt”da, həm də “Neftçi”də olarkən daha çox qalmaqallı fikirləriylə gündəmə gəlirdi, nəinki hansısa futbol uğuru...

Əlbəttə, onun “ağ-qaralar”dan təzminat almasıyla bağlı dediklərində haqq var. Deyir kimsə evinin pulunu mənə verməyib. Bu sözlər düzlüyün səhv ifadəsidi. Təbii ki, daha yumşaq danışmaq olardı. Ancaq bir ifadə var ki, ona heç cür haqq qazandırmaq olmur. Samir bəy bildirir ki, “Neftçi”nin indiki heyətini özü qurub və istefaya göndərilməsə, komanda bu gün indiki yerində olacaqdı. Belə anlaşılır ki, Abasov Yuri Verniduba “nə yoğurdun, nə yapdın, hazırca kökə tapdın” deyir. Başqa sözlə, həmkarının əziyyətinə kölgə salır.

Bəli, “Neftçi” bu gün ciddi tərəqqi əldə edib. Paytaxt təmsilçisi 4-cü sıradakı “Zirə”dən cəmi 1 xal geridədi. Ancaq hələ avrokuboklara vəsiqə əldə olunmayıb. Məncə, Samir bəy bu kollektivin uğurlarını öz adına yazmağa tələsib. Bir qədər də gözləyib nəticəni görəndən sonra daha dəqiq danışmaq olardı...

Samir bəy, “ağ-qaralar” avrokuboklara vəsiqə qazanmasa, günahkar kim olacaq? Siz, yoxsa Yuri Vernidub? Bəs, qazansa, uğurun memarı kim sayılacaq? Mən deyim: Vernidub!

KƏNAN BAHADIR