Bu transfer dönəmində artıq Romeyn Saiss və Jedson Fernandeşi heyətinə qatan ''Beşiktaş'' əsas ''bombanı'' partlatmağa yaxındı.

İstanbul nəhəngi uzun müddətdi danışıqlar apardığı Vut Veqhorstla anlaşmağa yaxındı. Rəhbərlik baş məşqçi Valerien İsmaelin çox bəyəndiyi ''Bernli''nın forvardını və onun ailəsini İstanbula gəlməyə razı sala bilib. 29 yaşlı oyunçunun həftəiçi İstanbula gələcəyi gözlənilir. Keçidin detallarına gəlincə, ''Beşiktaş'' niderlandlı futbolçunu birillik icarəyə götürəcək. Futbolçuya illik 2,7 milyon avro ödəniləcək. Müqavilədəki xüsusi maddəyə əsasən ''Bernli''yə icarə haqqı ödənilməyəcək. Bundan başqa ''ağ-qaralar'' mövsümün sonunda bu futbolçunu 8 milyon avroya daimi əsasda transfer edə bilmək hüququnu da elə keçirib.

Qeyd edək ki, Veqhorst vətənində ''Emmen'', ''Herakl'', ''Alkmaar''ın şərəfini qoruyub. O son illərdə ''Volfsburq''dakı çıxışı ilə populyarlıq qazanmışdı. Veqhorst bu klubda 3,5 il ərzində 144 rəsmi oyuna 70 qol vurmuşdu. Niderland yığmasında 14 oyuna 3 qol vuran hücumçu ötən mövsümün qış fasiləsində 12 milyon avroya ''Bernli''yə transfer olundu. O, premyer-liqanı tərk edən bu klubda 20 matçda 2 qol, 3 məhsuldar ötürməlik performans sərgiləyərək ümidləri doğrulda bilmədi.