"Qarabağ" Misli premyer-liqasının 28-ci turunda "Sabah"ı qəbul edəcək.

Bilindiyi kimi, "Tofiq Bəhramov"da keçiriləcək qarşılaşma aprelin 18-i, saat 19.30-da başlayacaq. Əslində bu oyun ətrafında müzakirələr daha geniş olmalı, matç böyük maraqla gözlənməliydi. Lakin "köhlən atlar"ın ötən həftə səfərdə "Şamaxı" ilə bacarmaması (0:0) əksər futbolsevərlər üçün görüşün əhəmiyyətini azaltdı.

Bu gün çoxu ağdamlıların "bayquşlar"ı məğlub etsə də, çempion ola bilməyəcəyini düşünür. Dəlilləri isə "Qarabağ"ın əvvəlki kimi əzmkar, döyüşkən görünməməsi, Masazır təmsilçisinin xal itirmək ehtimalının az olmasıdı. İş o həddə çatıb ki, Qurban Qurbanovun komandasının 3-cü pilləyə düşəcəyini düşünənlər də var. O başqa məsələ ki, hazırda bu sırada qərarlaşan "Turan Tovuz"un prezidenti Ehtiram Quliyev ötən həftə "Sumqayıt"la matçdan sonra qələbə qazanmalarına, qarşıda "Qarabağ"la oyunlarının olmasına rəğmən, əsas məqsədin mövqelərini qorumaq olduğunu bildirdi.

Hər halda, hələ çempionluq uğrunda mübarizə bitməyib. "Köhlən atlar" müxtəlif üsullarla "Tofiq Bəhramov"a daha çox azarkeş cəlb etməyə, "bayquşlar" isə böyük ehtimalla son oyunlarda sıx rast gəlinən ani diqqətsizlikdən qol buraxmaq kimi problemi aradan qaldırmağa çalışır. Bəli, "Qarabağ"ın heyətlə bağlı görəcəyi iş, demək olar ki, yoxdu. Çünki söhbət Çempionlar Liqasına vəsiqə qazanmaqla kifayətlənməyən, pley-offa qədər irəliləyən futbolçulardan gedir. Bu gün onlara yalnız yorğunluqdan xilas olmaq üçün vaxt lazımdı ki, sıx qrafik buna imkan vermir.

Nə olur-olsun, bizi "Tofiq Bəhramov"da möhtəşəm oyun gözləyir. Ümumiyyətlə, "Qarabağ"la "Sabah"ın duelləri həmişə maraqlı keçib. Heç şübhəsiz, bu dəfə də neytral azarkeşlər hədsiz zövq alacaq.

Sadiona gəlmək üçün isə səbəb yetərincədi. Azı ona görə ki, "Qarabağ" son şansını sınayacaq. "Sabah" isə ehtirasların son həddə çatdığı mübarizəyə nöqtə qoymağa çalışacaq. Odu ki, "Tofiq Bəhramov"a gəlin və illər sonra ələ düşən fürsəti qaçırmayın!

KƏNAN BAHADIR