Türkiyə çempionatında inamla turnir cədvəlinə başçılıq edən “Qalatasaray”la bağlı transfer xəbərləri var.

Football-plus.az xəbər verir ki, İstanbul nəhəngi Olimpiu Morutsana görə italyanlardan gələn təklifi geri çevirib. “Cim-Bom” 2022-nin yayında 3,5 milyon avroya transfer etdiyi və ümidləri doğrultmayan rumıniyalı vingeri, bilindiyi kimi, bu mövsümün əvvəlində İtaliyanın B seriyası təmsilçisi “Piza”ya icarəyə vermişdi.

Bu klubun rəsmiləri Morutsana görə 3,5 milyon avro təklif etsələr də, “sarı-qırmızılar” 5,5 milyon avro tələb edir. “Qalatasaray”da 34 rəsmi oyunda 3 qol, 5 məhsuldar ötürməlik performans sərgiləyən 23 yaşlı futbolçu İtaliyada 20 rəsmi oyunda 5 qol, 7 məhsuldar ötümə ilə yadda qalıb. Onun icarə müddəti bu il mayın 31-də başa çatacaq. “Piza”nın həmin tarixə qədər yenidən istanbulluların qapısını döyəcəyi gözlənilir.

Morutsanın meneceri isə bildirib ki, futbolçu İtaliyada xoşbəxtdi və istər “Piza”, istərsə də başqa klub olsun, mütləq İtaliyada qalmaq istəyir.