"Araz-Naxçıvan" Misli premyer-liqasının 28-ci turunda "Turan Tovuz"a uduzub - 0:3.

"Football-plus.az" xəbər verir ki, "qırmızı-ağlar"ın baş məşqçisi Andrey Demçenko oyunsonrası mətbuat konfransında jurnalistlərin suallarını cavabladı.

- Oyundan əvvəl desəydilər ki, 0:3 hesabı ilə məğlub olacağıq, buna inanmazdım. Birinci hissədə oyunumuz alınırdı. Qol şansları oldu, amma yararlana bilmədik. İkinci yarıda da yaxşı imkanlar oldu. Futbolda qızıl qayda var, qol vurmasan, sənə qol vuracaqlar. 90 dəqiqə ərzində oyuna köklənməni saxlamaq lazımdı. Oyunun sonlarında bizdə alınmadı və uduzduq. Son saniyəyə kimi döyüşməlisən.

- Məğlubiyyətə görə məsuliyyət futbolçuların üzərindədi? Özünüzdə günah görmürsüz?
- Heç kim demir ki, günahkar futbolçulardı. İlk növbədə baş məşqçi günahkardı. Deməli mən qalib gəlmək üçün lazım olan işi görməmişəm. Tam şəkildə məsuliyyəti üzərimə götürürəm.

- Bu məğlubiyyətdən sonra avrokubok hədəflərinin tam bitdiyini demək olar?
- Məqsəd var. Sona qədər mübarizə aparmaq lazımdı. Rəqiblərin də öz aralarında oyunları olacaq. Şansın tam bitdiyini deməzdim.

- "Araz-Naxçıvan" ilk "6-lıq"da yer alan komandaları məğlub edə bilmir. Bunun səbəbi nədi?
- Yəqin ki, müdafiədən hücuma keçiddə çətinlik var. Buna görə lazım olan nəticəni ala bilmirik. Oyunçuları müasir futbola keçirməyə çalışırıq. Top saxlamaq, təzyiq göstərmək... Bütün komandanın bu rejimdə çalışması vacibdi. Bir futbolçuda düşüş olursa, bu, bütün komandaya təsir edir. Sistemə kimsə daha tez, kimsə çətin uyğunlaşır. Hər şeyə baş məşqçi qərar verir. Bütün məsuliyyət mənim üzərimdədi.