Bilindiyi kimi, “Sabah” aprelin 22-də Bizon ölkə kubokunun yarımfinalının cavab oyununda “Qarabağ”ı qəbul edəcək. Komandaların “Tofiq Bəhramov”da keçirilən dueli 2:2 hesablı heç-heçə ilə nəticələndiyindən cütün taleyinə Masazırda – “Bank Respublika Arena”da aydınlıq gələcək.

Məlumdu ki, çempion olmaq şansı böyük ölçüdə azalan “köhlən atlar” kuboku başı üzərində qaldırmaqla Avropa Liqasında çıxış etməyi hədəfləyir. “Bayquşlar” isə tarixində ilk dəfə “qızıl dubl” etmək niyyətindədi.

Bəs, bu cür əhəmiyyətli qarşılaşmaya maraq nə dərəcədə böyükdü?

“Sabah”ın mətbuat xidmətinin rəhbəri Elnur Həmidovun “Football-plus.az”a verdiyi məlumata görə, indiyə qədər oyun üçün cəmi 3 min bilet satılıb.

Heç şübhəsiz, qarşıdakı günlərdə sayın artacağı gözlənilir. Öz aramızdı, futbol ictimaiyyətinin diqqəti hələ premyer-liqanın 28-ci turunda keçiriləcək “Qarabağ” – “Sabah” matçındadı.

Xatırladaq ki, kubokdakı duel saat 20.00-da başlayacaq.

KƏNAN BAHADIR