Premyer-liqanın 28-ci turunda “Sabah”ı qəbul etməyə hazırlaşan “Qarabağ” tribunalara daha çox azarkeş cəlb etmək üçün müxtəlif addımlar atır. İndiyə qədər açıqlanan məlumatlara görə, xanımlara və stadiona “Qarabağ” formasıyla gələnlərə pulsuz bilet veriləcək.

Maraqlıdı, bəs, “bayquşlar”ı çətin səfər oyununda nə qədər azarkeş dəstəkləyəcək?

Bu sualla Masasır təmsilçisinin mətbuat xidmətinin rəhbəri Elnur Həmidova müraciət etdik. Klub rəsmisinin “Football-plus.az”a verdiyi məlumata görə, tribunalarda təxminən 3 min “Sabah” azarkeşi olacaq. Klub tərəfdarlarının stadiona rahat gəliş-gedişini təmin etmək məqsədi ilə avtobuslar ayıracaq.

Maraq üçün xatırladaq ki, “Qarabağ”ın “Sabah”a qarşı martın 1-də keçirdiyi premyer-liqa oyununda 10 min 361, aprelin 3-də keçirilən ölkə kubokunun yarımfinal matçında 21 min tamaşaçı olub. Ümid edək ki, aprelin 18-də keçiriləcək qarşılaşmada yeni rekord qeydə alınacaq. Axı “Tofiq Bəhramov”un tamaşaçı tutumu 31 min 200 yerlikdi.

KƏNAN BAHADIR