Srağagün Tovuz şəhər stadionunda “Turan Tovuz”un yeni baş məşqçisi Ayxan Abbasovun imza törəni və təqdimat mərasimi keçirilib.

Tədbirdə Müşahidə Şurasının sədri Oqtay Abdullayev, klubun icraçı direktoru Nadir Nəbiyev, rayonun Gənclər və İdman İdarəsinin rəisi Sahib Ələsgərov iştirak edib. Ayxan bəy “2+1” illik anlaşmaya imza atıb, görüləcək işlər barədə danışıb. Sonda azarkeşlərin suallarını cavablayan 40 yaşlı mütəxəssis onlarla xatirə şəkli çəkdirib.

Dünən Bakıya qayıdan Ayxan Abbasovun Tovuza səfəri ilə bağlı təəssüratını öyrəndik. Eyni zamanda, bizi maraqlandıran başqa suallara da cavab tapmağa çalışdıq.

- Müstəqillik tarixində ilk dəfə klub öz məşqçisinin imza törənini açıq havada, azarkeşlərin gözü önündə keçirdi. Rəhbərliyin bu addımını necə qarşıladız?

- Bu məqamı düz qeyd etdiz. Mənim də yadıma gəlmir ki, hansısa klub bu addımı atsın. Həqiqətən çox xoşuma gəldi. Fürsətdən istifadə edib “Turan Tovuz” rəhbərliyinə təşəkkür edirəm. Klubun adına layiq imza törəni oldu. Köklü klub olduqlarını bir daha sübut etdilər. Həmişə “Turan Tovuz”da futbol adamlarının çalışdığını vurğulamışam. Rəhbərliyin klubla bağlı böyük layihələri, diqqəti çəkən planları var. Təbii ki, onların hamısını qısa müddətdə gerçəkləşdirmək mümkün deyil. Ancaq inanıram ki, zamanla bu işləri görə biləcəyik.

- Tovuzlu azarkeşlər baş məşqçi Ayxan Abbasovu necə qarşıladı, futbol oynadığınız dönəmlə indiki arasında hansı fərqi gördüz, hiss etdiz?

- Qarşılanma yaxşı oldu. Rəhbərliyin, azarkeşlərin, akademiyanın əməkdaşlarının isti münasibətini ilk dəqiqələrdən hiss etdim. Mənə, gələcəkdə bir yerdə böyük uğurlara imza atacağımıza inandıqlarını gördüm. Azarkeşlərlə söhbət zamanı futbol oynadığım illəri, ayrı-ayrı oyunlarda yaşanan maraqlı, yaddaqalan olayları xatırladıq. Tovuzlu azarkeşləri çox yaxşı tanıyıram, onların komandanı necə motivasiya etdiklərinə bələdəm. Qeyd etdiyim bu nüanslar məni Tovuza gətirdi. İnşallah, düşünürəm ki, hər iki tərəf üçün xeyirli olar.

- Siz yeni müqaviləyə imza atdız. Bəs köməkçiləriniz?

- Yaxın bir həftədə həm futbolçular, həm də köməkçilər müqavilə bağlayacaq və ictimaiyyətə təqdim olunacaq.

- Yeri gəlmişkən, məşqçilər korpusunda kimlərin çalışacağı tam müəyyənləşib?

- Bu məsələyə nöqtə qoymaq üçün mənə bir qədər vaxt lazımdı. Yaxın günlərdə həm köməkçilərim, həm də əvəzedici komandanın məşqçilər korpusunda kimlərin çalışacağı dəqiqləşəcək.

- “Turan Tovuz”un büdcəsi ilə bağlı fərqli fikirlər səslənir. Sizin baş məşqçi kimi təyinatınız da bildiyim qədər büdcənin təsdiqi ilə bağlı ləngiyirdi. Bu suala artıq aydınlıq gəldiyini düşünmək olar?

- Bu gün üçün büdcə rəsmən tam açıqlanmasa da, bilirik ki, “Turan Tovuz”la “Kəpəz”in premyer-liqaya yüksəlməsi Azərbaycan futbolunun inkişafı yönündə təkandı. AFFA bu klublara dəstək verir, Futbolun İnkişaf Fondu problemlərlə yaxından maraqlanır. Biz də əlimizdən gələnin ən yaxşısı etməyə hazırıq və bu məqsədlə bura gəlmişik. İnşallah, ümid edirəm ki, ortaya heç bir çətinlik çıxmaz. Hər kəs istəyir ki, həm “Turan Tovuz”, həm də “Kəpəz” ölkə futboluna rəng qatsın, bölgənin əvvəlki futbol ənənələrini qaytarsın.

RƏŞAD